काठमाडौं- यही शुक्रबार सत्तारुढ नेकपा एमालेले गर्न लागेको सभास्थल परिवर्तन भएको छ ।

एमाले बागमती इन्चार्ज डा. राजन भट्टराईले पहिले भृकुटीमण्डपमा गर्ने भनिएको सभास्थल परिवर्तन गरेर दरबारमार्गमा सारिएको जानकारी दिए ।

बुधबार सम्पादकहरूसँगको अन्तरसंवादका क्रममा उनले शुक्रबार दरबारमार्गमा शुभेच्छुक, समर्थक र कार्यकर्तासहित एक लाख मानिस उतार्ने जानकारी दिएका छन् ।

भट्टराईका अनुसार बिहान ११ बजेर ३० मिनेटमा भद्रकालीबाट जुलुस सुरु गरेर न्यूरोड, वीर अस्पताल र रत्नपार्क हुँदै दरबारमार्गमा सभामा परिणत हुनेछ ।

‘हाम्रो अनुमान एक लाख मानिस जम्मा हुनेछन्। पहिले भृकुटीमण्डपमा गर्न खोजेका थियौँ । तर मान्छेको उपस्थिति बढ्न सक्ने र ट्राफिक जाम धेरै हुने भएकाले दरबारमार्गमा सभास्थल कायम गरेका हौँ’, भट्टराईले भने ।

उनका अनुसार मध्यान्ह साढे १२ बजे उक्त सभालाई प्रधानमन्त्री एवम् पार्टी अध्यक्ष केपी शर्मा ओलीले सम्बोधन गर्ने भएका छन् ।