काठमाडौं– फर्मासिस्ट र फार्मेसी सहायकलाई पुष ४ देखि नामप्लेटसहितको सेतो एप्रोन अनिवार्य गरिएको छ । 

नेपाल फार्मेसी परिषद्ले एक सूचना जारी गर्दै उक्त नियमका विषयमा  जानकारी दिएको हो । फार्मेसी वा अस्पताल फार्मेसीमा औषधि  डिस्पेन्सिङमा कार्यरत रहेका फर्मासिस्ट र फार्मेसी सहायकले आगामी पुष ४ देखि औषधि डिस्पेन्सिङ गर्दा देहायको नामट्याथ सहितको सेतो एप्रोन लगाई मात्र डिस्पेन्सिङ गर्नुपर्ने अनिवार्य व्यवस्था लागू गरिएको छ । 

फर्मासिस्ट र फार्मेसी सहायकले यसको उल्लङ्घन गरेमा परिषद्को कोड अफ कन्डक्ट पालना नगरेको मानिने छ सूचनामा भनिएको छ । 

फर्मासिस्टले हरियो पृष्ठभूमिमा सेतो रंगको अक्षरमा नाम, पद र परिषद् दर्ता नम्बर र फार्मेसी सहायले निलो पृष्ठभूमिमा सेतो रंगको अक्षरमा नाम, पद र परिषद् दर्ता नम्बर उल्लेख गर्नुपर्नेछ ।

सामुदायिक फार्मेसी वा अस्पताल फार्मेसीमा सेवा प्रवाह गर्दा माथि उल्लेख भएको ड्रेसकोड मिति २०८१ पुस ४ बाट अनिवार्य रुपमा प्रयोग गर्न सम्पूर्ण फर्मासिस्ट एवम् फार्मेसी सहायकलाई जानकारी गराइएको छ । साथै २०८१ पुस ४ बाट ड्रेसकोडको पालना भए नभएको सम्बन्धी अनुगमन परिषदबाट हुने र पालना नभएको अवस्थामा परिषद्को नियमावली २०५९ को परिच्छेद ३ को ३.२ बमोजिम कारबाही प्रक्रिया अगाडि बढाइने बताइएको छ। 

यसैगरी ब्याचलर इन फार्मेसीको २६ औं नाम दर्ता परीक्षा मिति २०८१ मंसिर १५ र डिप्लोमा इन फार्मेसीको मिति २०८१ मंसिर २२ गते हुने रचनामार्फत जानकारी गराइएको छ ।