काठमाडौं – नेपालले अमेरिकाविरुद्धको टी-२० आई सिरिज एक खेल अगाडि सुपर ओभरबाट उचालेको छ।
सुरुमा ब्याटिङ गरेको नेपालले दिएको १७१ रनको लक्ष्य पछ्याएको अमेरिकाले ८ विकेटको क्षतिमा १७० रन बनाएपछि खेल सुपर ओभरमा गएको थियो। अमेरिकाविरुद्धको दोस्रो खेल सुपरओभरमा गएको हो। सिरिजको पहिलो खेल नेपालले १७ रनले जितेको थियो।

सुपर ओभरमा नेपालका लागि सोमपाल कामीले सनसनीपूर्ण बलिङ गर्दै चार बल फालेर दुई विकेट लिए। अमेरिकाले सुपर ओभरमा चार बल खेलेर ३ रनको चुनौती दिएको थियो।

सुपर ओभमा ब्याटिङका लागि पुगेका अमेरिकाका आरोन जोन्स र शायन जहाँगीरलाई सोमपालले लगातार तेस्रो र चौथो बलमा आउट गरेका हुन्।

सुपर ओभरमा तीन रनको लक्ष्य पछ्याएको नेपालले चार बल खेल्दै जित निकालेको हो। पहिलो र दोस्रो बलमा एकएक रन जोडेको नेपालले तेस्रो बल डट खेल्यो। नेपालले चौथो बलमा रन जोड्दै एक खेल अगाडि सिरिज उचालेको हो। सुपर ओभरमा कप्तान रोहितकुमार पौडेल र कुशल भुर्तेलले ब्याटिङ गरे।

अमेरिकाविरुद्ध १७१ रनको चुनौती दिएको नेपालका लागि तेस्रो क्रममा ब्याटिङमा आएका कुशल भुर्तेलले ७ चौका र ६ छक्काको मद्दतमा नटआउट ९२ रन बनाएका थिए। उनी रोचक खेलको म्यान अफ द म्याच बने।

ओपनर आशिफ शेख चार बल खेलेर आउट हुँदा अर्का ओपनर अनिल साहले ३१ बलको सामना गर्दै २५ रन जोडे। उनले दुई चौका र एक छक्का प्रहार गरे। गुल्सन झाले १२ बल खेल्दै दुई चौका र एक छक्काको मद्दतमा १९ रन जोडे। कप्तान रोहित पौडेलले १४ बलमा दुई चौकाको मद्दतमा १८ रन बनाए।

दीपेन्द्रसिंह ऐरीले भने तीन बलमा २ रनमात्र जोड्न सके। आरिफ शेख १ रन बनाएर आउट भएको खेलमा एक बल खेल्न मैदान पुगेका करण केसीले छक्का प्रहार गरेका थिए। कमजोर सुरुवात गरेको नेपालको मध्यक्रम चल्दा ६ विकेटको क्षतिमा १७० रन बनाएको थियो।

नेपालका सुरुवाती बलरले कसिलो बलिङ गर्न नसक्दा खेल सुपर ओभरमा पुगेको थियो। ८ विकेटको क्षतिमा १७० रन बनाएको अमेरिकाविरुद्ध नेपालका लागि करण केसीले तीन विकेट लिँदा सोमपाल कामीले दुई विकेट हात पारे। सागर ढकाल र दीपेन्द्रसिंह ऐरीले एकएक विकेट लिए। सिरिज अन्तर्गतको अन्तिम खेल सोमबार हुँदैछ।