काठमाडौँ– बङ्गलादेशमा हिन्दु धर्मावलम्बीविरुद्ध जारी हिंसाको विरोधमा अमेरिकाको राजधानी वाशिङ्टन डीसीमा प्रदर्शन गरिएको छ । बङ्गलादेशमा हिन्दु धर्मावलम्बीविरुद्ध हिंसा भइरहेको भन्दै वाशिङ्टन डीसीस्थित राष्ट्रपति भवन ह्वाइट हाउसअगाडि प्रदर्शन गरिएको हो ।

प्रदर्शनमा मानव अधिकारवादी, अमेरिकामा रहेका बङ्गलादेशी आप्रवासी समुदायका मानिसहरूको सहभागिता रहेको भारतीय समाचार संस्था एएनआईले जनाएको छ । प्रदर्शनमा सहभागीहरूले अमेरिका र बङ्गलादेशको झण्डासहित नाराबाजी गरेका थिए ।

उनीहरुले बङ्गलादेशमा नयाँ सरकारको नेतृत्व सम्हालेका नोबेल पुरस्कार विजेता मुहम्मद युनुसले हिन्दु समुदायको सुरक्षाको ग्यारेन्टी गर्नुपर्ने माग गरेका थिए ।

 यसका लागि बङ्गलादेश सरकारले हिन्दु धर्मावलम्बीसहित अन्य अल्पसङ्ख्यक समुदायको सुरक्षाका लागि स्थायी प्रबन्ध गर्नुपर्ने समेत माग गरेको एएनआईले उल्लेख गरेको छ ।