काठमाडौं- मंगलबार काठमाडौंमा आयोजित एक कार्यक्रममा नेपाली कांग्रेसका सभापति शेरबहादुर देउवाले किताबलाई लिएर एउटा आरोप झेल्नु परेको छ।

‘स्कुल अफ डेमोक्रसी’ संस्थाले नेपाली कांग्रेसका प्रदीप गिरिको दोस्रो स्मृति दिवसको अवसरमा मंगलबार गरेको ‘निष्ठा, नैतिकता र राजनीति’ विषयक संवाद कार्यक्रममा देउवाले किताब फिर्ता नगरेको आरोप झेल्नु परेको हो ।

कार्यक्रममा वक्ताका रुपमा आएकी प्रदीप गिरि पत्नी भारतीय सिलवाललले देउवालाई किताव फिर्ता नगरेको आरोप लगाउँदै व्यंग्य कसिन् ।

कांग्रेस नेता स्व. गिरि पत्नी भारतीले मञ्चबाटै देउवाले आफ्नो किताब लगेर फिर्ता नगरेको गुनासो गरेपछि कार्यक्रमस्थलमा हाँसो छाएको थियो । उता देउवा पनि केही अप्ठेरो मानेर हाँसिरहेका थिए।

‘शेरबहादुरजी लन्डनबाट फर्किनुभएको थियो । उहाँलाई याद छ कि छैन, हामी त्यतिबेला थापाथलीमा बस्थ्यौँ’, उनले भने, ‘उहाँ जाने बेलामा मेरो एउटा जयकृष्णमूर्तिको किताब लिएर जानुभयो, मेरो अनुमतिबिना… ।’

उनले आफ्नो निवासबाट शेरबहादुरले कृष्णमूर्तिको किताब लगेको खुलाइन् । ‘शेरबहादुरजीले लैजानुभएको कृष्णमूर्तिको किताब… । उहाँ गृहमन्त्री पनि भइसक्नुभयो, पाँचपटक प्रधानमन्त्री पनि भइसक्नुभयो’, उनले भनिन्, ‘छैटौँपटक प्रधानमन्त्री हुने सम्भावना छ । तर, उहाँले मेरो किताब फर्काउनुभएको छैन । म त्यो किताबको प्रतीक्षामा छु ।’

त्यसपछि बोल्न मञ्चमा चढेका देउवाले आफूलाई त्यसरी किताब लगेको सम्झना नै नरहेको पनि बताए । ‘भारती सिलवालजीले एउटा कुरा भन्नुभएको छ,उहाँको किताब मैले लगेको भनेर । त्यसको मलाई सम्झना छैन, तैपनि किताबले मलाई फाइदै भयो होला । उहाँलाई धन्यवाद दिन चाहन्छु ।’