काठमाडौं– संस्कृति पर्यटन तथा नागरिक उड्डयनमन्त्री बद्री पाण्डेले आफू निष्ठाको राजनीतिबाट कहिल्यै नझुक्ने बताएका छन् ।

शनिबार नेपाली काँग्रेस बाजुरा काठमाडौँ सम्पर्क समितिका सभापति अधिवक्ता सूर्य बहादुर शाहको अध्यक्षतामा आयोजित बधाई तथा सम्मान कार्यक्रममा बोल्दै मन्त्री पाण्डेले साे कुरा बताएका हुन् ।

तीन पटकसम्मको संसदीय यात्रामा रहेका पाण्डे पहिलो पटक मन्त्री बनेसँगै काँग्रेस बाजुरा सम्पर्क समितिले सम्मान गरेको हो ।  कार्यक्रममा बोल्दै मन्त्री पाण्डेले बाजुरा जिल्लाका मतदाता, शुभेच्छुक तथा शुभचिन्तक प्रति कृतज्ञता प्रकट गरे । 

उनले भने, जिल्लाका सबै मतदाता प्रति कृतज्ञ छु । अहिले जे प्राप्त गरेको छु, कार्यकर्ता, पार्टी र नेताहरूको विश्वासका कारण भएको हो । निष्ठाको राजनीतिबाट कहिल्यै झुक्न दिन्न । उनले शुभेच्छुकहरूबाट विकृति, विसङ्गति र भ्रष्टाचार अन्त्य गर्नुपर्ने शुभेच्छा पाइरहेको बताए । 

मन्त्री पाण्डेले मन्त्री, प्रधानमन्त्रीहरू गतिहीन हुन नहुनेमा जोड दिए । फरक प्रसङ्गमा  बोल्दै मन्त्री पाण्डेले काँग्रेस र एमाले मिलेर सरकार बनाउनु रहर नभएर बाध्यता भएको दाबी गरे । 

उनले अघिल्लो सरकारले ल्याएको बजेट प्रति असन्तुष्टि हुँदा हुँदै पनि कार्यान्वयन गर्नुपर्ने बाध्यता रहेको उल्लेख गरे। मन्त्री पाण्डेलाई काँग्रेस नेता कार्यकर्ताहरूले जिल्ला र मुलुकको शिर ठाडो पार्ने गरी काम गर्न समेत अनुरोध गरेका थिए । 

साथै जिल्लाका सम्भावित पर्यटन क्षेत्रको विकासका लागि विशेष पहल गर्न समेत आग्रह गरेका थिए । कार्यक्रममा जिल्ला सभापति, पूर्व सभापतिहरू, संविधानसभा सदस्यका साथै पार्टीका विभिन्न तहका नेता कार्यकर्ताहरूको सहभागिता रहेको थियो ।