काठमाडौँ– भारतीय प्रधानमन्त्री नरेन्द्र मोदीले तेस्रो कार्यकाल शुरु गर्दै गर्दा दर्जनौँ भारतीय कम्पनीले साधारण शेयर (आईपीओ) जारी गर्ने भएका छन् । 

आगामी २ महिनामा भारतीय शेयर बजारमा हजारौँ करोड भारु बराबरको आईपीओ जारी हुन लागेको आर्थिक अनलाइन समाचार पोर्टल इकोनोमिक टाइम्सले जनाएको छ ।

हालसम्म १८ वटा कम्पनीले भारतीय प्रत्याभूति एवम् विनिमय बोर्ड सेबीबाट आईपीओ जारी गर्ने विषयमा अनुमति पाइसकेका छन् । यी १८ कम्पनीले २० हजार करोड भारु बराबरको आईपीओ निष्काशित गर्ने अपेक्षा गरिएको छ ।

त्यसबाहेक अरु ३७ कम्पनीहरू आईपीओ जारी गर्ने प्रक्रियामा रहेको जनाइएको छ । यी कम्पनीहरूले ५० हजार करोड भारु बराबरको आईपीओ बजारमा ल्याउने बताइएको छ ।

सन् २०२४ मा भारतका ३० वटा कम्पनीले बजारमा २७ हजार ७ सय ८० करोड बराबरको आईपीओ जारी गरिसकेका छन् । सन् २०२३ मा ५७ कम्पनीले ४९ हजार ५ सय करोड भारुको आईपीओ बजारमा ल्याएका थिए ।