ताप्लेजुङ- पाथिभरामा केबलकार निर्माणको विरोध गरिरहेका पहिचानवादी अभियन्ताले फुङलिङका मेयर अमिर मादेनको अभिव्यक्तिप्रति आपत्ति जनाएका छन् ।

मेयर मादेनले यसअघि खबरहबलाई दिएको प्रतिक्रियामा केबलकार निर्मातासँग मुकुम्लुङ पक्षधरहरुले मध्यस्थकर्तामार्फत बार्गेनिङ गरिरहेको बताएका थिए ।

मादेनले खबरहबसँग भनेका थिए, ‘मुकुम्लुङवालाहरुले कमिसन नमिलेर केबलकार बनाउन नदिने भनेका हुन् । सुरुमा ५ करोडमा बार्गेनिङ गरे, दिने कुरै भएन । अहिले २५ करोडको दाबी हुँदैछ, मध्यस्थकर्ताहरुले २५ करोडमा मिलाइदिन्छौं भनेको सुनें ।’

मेयर मादेनले ताप्लेजुङको विकास र समृद्धिका लागि पाथीभरामा केबलकार बन्ने पर्ने बताउँदै यसको निर्माण प्रक्रिया वैधानिकमरुपमै अघि बढिरहेको दाबी गरेका थिए ।

यो पनि
पाथीभरा केबलकार : तीन पालिकालाई बहिस्कार, विकास समिति बेखबर

यसैवीच, मेयरको भनाइप्रति आपत्ति जनाउँदै मुकुम्लुङ संयुक्त संघर्ष समितिका संयोजक श्री लिङखिम र केबलकार खारेजी संयुक्त संघर्ष समिति ताप्लेजुङका संयोजक खगेन्द्र फेम्बुले संयुक्त विज्ञप्ति जारी गरेका छन् ।

विज्ञप्तिमा भनिएको छ, ‘पछिल्लो समय आन्दोलनलाई बदनाम गर्ने मनसायबाट फुङलिङ नगरपालिकाका मेयर अमिर मादेनले खबरहब डिजिटल पत्रिकामा दिएको गैरजिम्मेवारपूर्ण भनाइप्रति संघर्ष समितिको गम्भीर ध्यानाकर्षण भएको छ ।’

केबलकार निर्माणमा कुनै पनि बार्गेनिङ गरेको कुरा प्रमाणित गर्न विज्ञप्तिमार्फत मेयर मादेनलाई चुनौतीसमेत दिइएको छ ।

हेर्नुहोस् विज्ञप्ति