काठमाडौं– प्रतिनिधिसभाका सभामुख देवराज घिमिरे, राष्ट्रियसभाका अध्यक्ष नारायणप्रसाद दाहाल र अर्थमन्त्री वर्षमान पुनबीच छलफल भइरहेको छ ।

सभामुखको सरकारी निवासमा जारी बैठकमा संघीय संसद सचिवालयका कर्मचारीको आन्दोलन र समाधानका विषयमा छलफल भइरहेको हो ।

यस विषयमा सभामुख घिमिरेले प्रधानमन्त्री पुष्पकमल दाहाल र कानून, न्याय तथा संसदीय मामिला मन्त्री पदम गिरीसँग छलफल गरिसकेका छन् ।

आज प्रतिनिधिसभामा प्रधानमन्त्रीले सांसदहरुका प्रश्नमा जवाफ दिने कार्यसूची रहेकोले बिहान ११ बजे बैठक बस्नु अघि नै समस्या समाधानको प्रयास भइरहेको हो ।

संघीय संसद सचिवालय कर्मचारी युनियनका तर्फबाट ११ बुँदे माग राखेर कर्मचारीहरू आन्दोलनमा छन्। केही दिनदेखि निरन्तर आन्दोलित उनीहरूले कार्यालय समयबाहेकमा काम गर्न नसक्ने जनाउँदै आएका छन् ।

कर्माचारीहरूले बुधबारको प्रतिनिधिसभा बैठकमा सभामुख देवराज घिमिरेको मात्रै अनुहार देखाएर प्रत्यक्ष प्रसारण गर्दै विरोध जनाएका थिए । जसका कारण संसद बैठक नै स्थगित गरिएको थियो ।

यो पनि…
संसद्‍का आन्दोलित कर्मचारीले सभामुखको मात्रै अनुहार देखाइरहेपछि…