काठमाडौं– चालु आर्थिक वर्ष (आव)को १० महिनामा नेपालमा २४ अर्ब बढीको सुन र २१ अर्ब बढीको सुन आयात भएको छ । भन्सार विभागले सोमबार सार्वजनिक गरेको तथ्यांकले १० महिनाको अवधिमा मोबाइल र सुन सो मात्रामा आयत भएको देखाएको हो ।

विभागद्वारा सार्वजनिक गरेको तथ्यांकअनुसार चालु आवको वैशाख मसान्तसम्ममा २४ अर्ब १ करोड २४ लाख २२ हजार रुपैयाँ बराबरको १५ लाख २८ हजार ६४४ थान मोबाइल आयात भएको छ । विभागका अनुसार सो अवधिमा आयात भएका मोबाइल फोनमा लगाइएको भन्सार करमार्फत सरकारले ४ अर्ब ४७ करोड १३ लाख ३१ हजार रुपैयाँ आम्दानी गरेको छ ।

त्यस्तै सोही अवधिमा नेपालमा २१ अर्ब ६५ करोड १ लाख ३३ हजार रुपैयाँ बराबरको २ हजार ४ सय ५१ केजी ८६४ ग्राम सुन आयात भएको छ । सरकारले सो सुन आयातको क्रममा भन्सार करबापत ३ अर्ब २४ करोड ७५ लाख ४८ हजार आम्दानी गरेको विभागको तथ्यांकले देखाएको छ ।

आयातमा सबैभन्दा अगाडि डिजेल

विभागको तथ्यांकअनुसार चालु आवको १० महिनामा नेपालमा आयात भएका वस्तुहरुमध्ये सबैभन्दा धेरै डिजेल आयात भएको देखिएको छ । सो अवधिमा १ खर्ब १५ अर्ब ६७ करोड १ लाख ३८ हजार रुपैयाँ बराबरको ११ लाख ९ हजार ११० किलोलिटर डिजेल आयात भएको हो । डिजेलको आयातबापत सरकारले ४४ अर्ब ८९ करोड ५ लाख २६ हजार रुपैयाँ भन्सार आम्दानी गरेको छ । 

त्यस्तै सो अवधिमा ५ लाख ६७ हजार ९३५ किलोलिटर पेट्रोल र ४३ करोड ३९ लाख ६३ हजार ९२ किलो एलपी ग्यास आयात भएको विभागले जनाएको छ ।