काठमाडौं– अभिनेत्री नीता ढुंगाना र युवा ज्योतिष एवं अभिनेता हरिहर अधिकारीको जोडीले निर्माण गरेको फिल्म  ‘ह्रस्व दीर्घ’को नयाँ पोस्टर सार्वजनिक भएको छ । आइतबार निर्माण पक्षले पोस्टर सार्वजनिक गरेको हो । 

सो पोस्टरमा दक्षिण भारतीय कलाकार विजय रावत र नेपाली अभिनेत्री विपना थापा फिचर्ड छन् । पोस्टरमा रावत फुलेको झुस्स दारीजुंगामा देखिएका छन् । पोस्टरमा उनी धार्मिक गुरुजस्तै देखिन्छन् । यद्यपि निर्माण पक्षले उनको भूमिकाबारे हालसम्म कुनै जानकारी दिएको छैन । 

पोस्टरमा कालो ब्रस्तमा देखिएकी विपना थापा आश्चर्य भावमा छिन् । यस फिल्मको निर्देशन चन्द्र पन्तले गरेका छन् । दशैँको अवसर पारेर असोज ११ गतेदेखि फिल्म प्रदर्शनमा ल्याउने निर्माण पक्षको योजना छ । 

हरिहर अधिकारीको कथा, नीता ढुंगाना निर्माता रहेको यस फिल्ममा यी दुई स्वयं मुख्य भूमिकामा छन् । सिनेमामा नेपालीसँगै भारतीय चर्चित कलाकारको अभिनय छ ।

नीता र हरिहरसँगै विपना थापा, सरोज खनाल, गरिमा शर्मा, सञ्चिता लुइँटेल, बुद्धि तामाङ, किरण केसी, प्रशान्त ताम्राकार, रविन्द्र झालगायत नेपाली कलाकारले अभिनय छ । भारतीय कलाकार विजयसँगै ब्रह्मानन्दमको अभिनय रहेको छ ।