काठमाडौं- प्रमुख प्रतिपक्षी नेपाली कांग्रेसले प्रतिपक्षमा रहेका दलहरूलाई फेरि छलफलका लागि बोलाएको छ ।

सोमबार बस्न लागेको प्रतिनिधिसभा बैठकबारे छलफल गर्न सभापति शेरबहादुर देउवाले प्रतिपक्षमा रहेका दलहरुलाई छलफलका लागि बोलाएका हुन् ।

कांग्रेस संसदीय दलको बैठक सकिएलगत्तै प्रतिपक्षी दलहरुको संयुक्त बैठक संघीय संसद भवनमा रहेको कांग्रेस संसदीय दलका नेता देउवाको कार्यकक्षमा बस्ने बताइएको छ ।

सहकारी ठगी प्रकरण छानबिनका लागि संसदीय समिति गठनका लागि एकमत देखिएका प्रतिपक्षी दलहरु आइतबार पनि संयुक्त छलफलमा जुटेका थिए ।

उक्त बैठकले सहकारी ठगी प्रकरणमा मुछिएका गृहमन्त्री रवि लामिछानेलाई बोल्न दिने निर्णय गरेको थियो ।

यसअघि शुक्रबार पनि कांग्रेसको आह्वानमा प्रतिपक्षी दलहरूले सहकारी ठगी प्रकरणको छानबिनका लागि संसदीय समिति गठनबारे छलफल गरेका थिए ।

उक्त छलफलबाट दलहरु समिति गठनका लागि एकमत भएका थिए । आइतबारको संसद् बैठकमा उपप्रधान तथा गृहमन्त्री रवि लामिछानेले जवाफ दिए पनि चित्तबुझ्दो नभएको जिकिर प्रमुख प्रतिपक्षीले गरेको छ ।