काठमाडौं– नेपाली कांग्रेसका चर्चित नेता बलबहादुर केसीलाई हराएर प्रतिनिधिसभामा आएका हिमाली जिल्ला सोलुखुम्बुका एमाले सांसद मानवीर राईले बुधबार संसदमा २ मिनेट बोल्ने मौका पाए ।

दुई मिनेटमा सांसद राईले जे सुनाए, त्यसबाट प्रचण्ड सरकारले दाबी गर्दै आएको ‘सुशासन’ वा ‘चुस्त प्रशासन’ को गफलाई गिज्याएको प्रतीत हुन्छ ।

संसदमा मानवीरले दुई मिनेटमा बोलेको कुराले दुर्गम जिल्लाका नागरिकको दैनिक काममा सरकारको उपस्थिति शून्य रहेको देखाएको छ । प्रधानमन्त्री प्रचण्डले एक वर्षमा सुशासनका लागि काम गरें भनिरहेका बेला एमाले सांसद राईले वास्तविकता उजागर गरिदिएका छन् । साथै दुर्गम क्षेत्रमा सुरक्षाकर्मीको स्थिति पनि कमजोर रहेको राईले स्पष्ट पारेका छन् ।

एमाले सांसद राईले बुधबार प्रतिनिधिसभामा बोल्दै भने, ‘लामो समयदेखि सोलुखुम्बु जिल्लाको इलाका प्रशासन कार्यलयमा प्रशाकीय अधिकृत नहुँदा नागरिकता वितरण लगायतका विभिन्न काम अवरुद्ध भएको छ ।’

उनले थपे, ‘त्यसैगरी सोलुखुम्बु जिल्लाको नाम्चे इलाका प्रशासन कार्यालयमा पनि गत ८÷९ महिनादेखि अधिकृत नहुँदाखेरि जनताले सास्ती दुःख पाएका छन् ।’

जिल्लाका दुईवटा इलाका प्रशासनबाट जनताले नागरिकता बनाउने लगायतका सरकारी सेवा लिन नपाएको ९ हप्ता होइन, ९ महिना पुगिसकेको रहेछ । यतिका दिनसम्म त्यहाँ सरकारले देखेन । भनेपछि, दुर्गमका जनताको दुःख कस्तो होला ? सांसद राईको भनाइबाट अनुमान लगाउन सकिन्छ ।

दुर्गम जिल्लामा सरकारी सेवाको त्यो स्थिति छ भने प्रहरी प्रशासनको उपस्थिति नहुँदा भीरमा अड्किएको लाससमेत भीरमै अलपत्र परेको सांसद राईले संसदमा दर्दनाक घटना सुनाए ।

‘दूधकोशी वडानम्बर १ बस्ने वर्ष २५ को केशव राई विगत फागुन २७ गतेबाट हराइरहेकोमा चैत ६ गते सोलुखुम्बु जिल्लाको विशेष पर्यटकीयस्थल खुम्बु पासाङल्हमु गाउँपालिका वडा नम्बर ३ दूधकोशीको किनारको अनकन्टार भीरमा उहाँको लास भेटिएको छ,’ राईले भने, ‘आजसम्म निकाल्न सकिएको छैन । शंकास्पद रुपले निजको घटना घटेको कुरा म गृहमन्त्री सरकारलाई अनुरोध गर्न चाहन्छु ।’

राईले अगाडि भने, ‘पर्यटकीय जिल्ला सोलुखुम्बुमा विभिन्न ढंगका शंकास्पद घटनाहरु घटिरहेका छन् । सोताङ गाउँपालिका वडा नम्बर ३ निवासी तुलमान राई चैत ६ गते हुँगा नदीको पुल बनाउने क्रममा ढुंगाले किचेर मारिएका छन्, । सरकारबाट क्षतिपूर्ति, राहत प्रदान गरियोस् ।’