काठमाडौं– राष्ट्रिय स्वतन्त्र पार्टी राप्रपाका अध्यक्ष राजेन्द्र लिङदेनले पार्टीले तत्काल सभामुखहरू फिर्ता बोलाउने कुनै निर्णय नगरेको  बताएका छन् । 

कोशी प्रदेशको भ्रमणमा रहेका लिङदेनले शनिबार खबरहबसँग कुरा गर्दे तत्काल सरकारबाट आफ्ना सभामुख फिर्ता बोलाउन राप्रपाले कुनै निर्णय नगरेको बताएका हुन् । 

उनले भने, ‘हामीले आन्दोलनका कार्यक्रम घोषणा गरेका छौँ । त्यो अगाडि बढ्छ । तर अहिले नै सभामुख फिर्ता बोलाउन पार्टीले कुनै निर्णय गर्दैन । विस्तारै छलफल हुन्छ ।’ 

प्रदेश सरकारको संरचनाप्रति नै असहमत रहेको राप्रपाले बागमती र कोशी प्रदेशमा सभामुख खाइरहेको छ । बागमतीमा एमालेसँगको गठबन्धन सरकार हुँदा नै सभामुख खाएको राप्रपाले कोशीमा २४ पुसमा कांग्रेस-माओवादी गठबन्धनसँग मिलेर सभामुख पद लिएको हो ।  

तर कोशीमा सत्तारुढ गठबन्धनले सभामुख राप्रपालाई सघाउने निर्णय गरेसँगै एमालेले पनि उक्त पदमा उम्मेदवारी नदिने निर्णय गरेको थियो ।

राप्रपाबाट कोशीको सभामुखमा अम्बरबहादुर विष्ट र बागमतीमा भुवन पाठक छन् । गणतन्त्र र संघीयताविरुद्ध आन्दोलन गर्ने बताइरहेको राप्रपामा सोही संरचनाभित्र पदलोलुपता देखिन नहुने भन्दै पार्टीभित्रै कोशीमा भएको सभामुख नियुक्त निर्णयमा असहमति थियो ।  

सरकारमा जानेबारे राप्रपामा दुई धार देखिएको छ । केन्द्रीय निर्देशन समितिका अध्यक्ष डा प्रकाश चन्द्र लोहनीलगायतका नेताहरू सरकारका जानु नहुने पक्षमा छन् ।  

कोशीमा सभामुख नियुक्त भएका बेला राष्ट्रिय प्रजातन्त्र पार्टीका  अध्यक्ष राजेन्द्र लिङ्देन मलेसियामा थिए । यता सत्ता गठबन्धनले भने राप्रपा र अध्यक्ष लिङदेनले दोहोरो चरित्र देखाएको बताइरहेको छ ।