काठमाडौं– मलेसियाले १० वर्षअघि हराएको विमानको फेरि खोजी सुरु गर्ने तयारी गरेको छ । चीनको बेइजिङबाट राजधानी क्वालालाम्पुरका लागि उडान भर्ने क्रममा सन् २०१४ मार्चमा हराएको मलेसिया एयरलाइन्सको एमएच ३७० विमानको फेरि खोजी सुरु गर्ने भएको हो ।

बेइजिङबाट २३९ यात्रुसहित उडेको विमान हराएको घटना आजसम्म पनि रहस्यको गर्भमै छ । वर्षौंसम्म उक्त विमानको खोजीका लागि मेलेसियाले प्रयास गरिरहेको थियो ।

हराएको विमानमा सवार यात्रुका आफन्तले अहिलेसम्म पनि उक्त घटना भुल्न सकेका छैनन् । शुक्रबार मलेसियाका परिवहनमन्त्री एन्थनी लोकेले मन्त्रिपरिषद्ले उक्त विमानको खोजीका लागि अमेरिकास्थित मरिन एक्सप्लोरेशन फर्म ओशन इन्फिनिटीसँग ७ करोड डलरको सम्झौताका लागि अनुमति दिएको जानकारी दिएका छन् ।

बीबीसीका अनुसार विमानको क्षतिग्रस्त भागहरू फेला परेपछि मात्रै मलेसिया सरकारले उक्त सम्झौता रकम ओशन इन्फिनिटीलाई भुक्तानी गर्ने बताएको छ ।

यद्यपि, सन् २०१८ मा ओशन इन्फिनिटीले सोही शर्तमा सुरु गरिएको खोजी अभियान तीन महिनासम्म पनि सफल हुन नसकेपछि बन्द गरिदिएको थियो । -बीबीसीबाट