काठमाडौं – राष्ट्रिय स्वतन्त्र पार्टी (रास्वपा) का सभापति रवि लामिछानेको फोटो प्रकरणका विषयमा अनुसन्धान गर्न प्रहरीले छानबिन समिति बनाएको छ। कास्की प्रहरी हिरासतमा सुतिरहेको सिसिटिभी क्यामेराको तस्बिर सामाजिक सञ्जालमा भाइरल भएपछि छानबिन समिति बनाएको हो।

रास्वपाका एक कार्यकर्ता निकोलस भुसालले आफूले तस्वीर सार्वजनिक गरेको भने पनि प्रहरीले अन्य अनुसन्धान र उनीमाथिको अनुसन्धानका लागि समिति बनाएको हो।

अनुसन्धान समितिमा गण्डकी प्रदेश तालिम केन्द्रका प्रमुख एसएसपी मुकुन्द मरासिनीको नेतृत्व छ । उनी सहित चार सदस्य छानबिन समिति बनाएको प्रहरीको भनाइ छ।

तस्वीर नियोजित रूपमा सार्वजनिक गरिएको भन्दै प्रहरीले समिति नै गठन गरेर छानबिन गर्न लागेको स्रोतको दाबी छ। दिउँसो सरकारका गृहमन्त्री रमेश लेखकले पनि फोटोबारे गहिरो अनुसन्धान गर्नुपर्ने बताएका थिए ।