मस्को- रसियामा युक्रेनविरुद्ध युद्धमा सहभागी उत्तर कोरियाका १०० जना सैनिक मारिएको दाबी छिमेकी दक्षिण कोरियाले गरेको छ ।

दक्षिण कोरियाका एकजना सांसदले युक्रेनविरुद्ध रूसको तर्फबाट लडिरहेका कम्तीमा पनि १०० जना उत्तर कोरियाली सैनिक मारिएको दाबी गरेका छन् ।

सांसद ली सुङ्ग क्वोनले पत्रकारहरूलाई बताएअनुसार दक्षिण कोरियाको जासुसी सेवाले यसबारे संसद्लाई जानकारी दिएको हो ।

उनले युद्धमा १००० हजारभन्दा बढी उत्तर कोरियाली सैनिक घाइते भएको पनि बताएका छन् । सांसद क्वोनले मारिएका कयौँ सैनिकमा उच्च अधिकारी पनि रहेका बताएका छन् ।

हालै मात्र रुसको तर्फबाट युक्रेनविरुद्ध लड्न १० हजारभन्दा धेरै सैनिक गएको खुलेको थियो ।

सोमबार अमेरिकी रक्षा मन्त्रालय पेन्टागनले पनि उत्तर कोरियाली सैनिक मारिएको पुष्टि गरेको थियो । तर कति मारिए भन्ने स्वतन्त्र पुष्टि भएको छैन ।