काठमाडौं- प्रमुख प्रतिपक्षी नेकपा (माओवादी केन्द्र) ले जुनसुकै बेला सडक आन्दोलनमा जानुपर्ने निष्कर्ष निकालेको छ।

माओवादीले कांग्रेस-एमाले नेतृत्वको सरकार प्रतिगमनतिर अघि बढ्ने अवस्था रहेको भन्दै नेता कार्यकतालाई आन्दोलनका लागि तयारी अवस्थामा रहन भनेको हो ।

हालै बसेको स्थायी कमिटी बैठकका निर्णयबारे जानकारी दिन अध्यक्ष पुष्पकमल दाहाल प्रचण्ड र महासचिव देव गुरुङले गरेको परिपत्रमा प्रतिगमन, राष्ट्रघात र भ्रष्टहरूको संरक्षण गर्ने दिशामा सरकार अघि बढेमा सडक आन्दोलन चर्काउनुपर्ने उल्लेख गरिएको छ ।

माओवादीले कांग्रेस–एमाले ७ बुँदे सहमतिलाई प्रश्चगामी र प्रतिगामी कदम भन्दै त्यहीमार्फत आन्दोलनतिर जानुपर्ने अवस्था रहेको जनाएको छ ।

माओवादीले प्रतिगमन, राष्ट्रघात, भ्रष्टहरूको संरक्षणको विरोध र जनताका दैनिक समस्यालाई सदनमा सशक्त रुपमा उठाउने पनि जनाएको छ ।

सदनमा खबरदारी गरिरहँदा पनि सरकार प्रतिगमनतिर गएमा सडक आन्दोलनबाहेक अर्को विकल्प नहुने ठहरसहित माओवादीले नेता-कार्यकर्तालाई तयारी अवस्थामा रहन निर्देशन दिएको हो ।