काठमाडौं- प्रमुख प्रतिपक्षी नेकपा माओवादी केन्द्रले पार्टीभित्र गुटबन्दी मौलाएको निष्कर्ष निकालेको छ ।
यही साता सम्पन्न स्थायी कमिटी बैठकपछि नेकपा (माओवादी केन्द्र) ले जारी गरेको आन्तरिक सर्कुलरमा उक्त कुरा उल्लेख छ ।
पार्टी अध्यक्ष पुष्पकमल दाहाल ‘प्रचण्ड’ र महासचिव देवप्रसाद गुरुङले जारी गरेको सर्कुलरमा पार्टीमा व्यक्तिगत स्वार्थ, पद प्रतिष्ठा केन्द्रित प्रवृत्ति बढ्न थालेको उल्लेख छ ।
व्यक्तिगत स्वार्थ, पद प्रतिष्ठा केन्द्रित प्रवृत्ति बढ्दा निजी स्वार्थ समूहहरूको गुट–उपगुट पनि क्रियाशील भइरहेको निष्कर्ष माओवादीले निकालेको छ ।
विधान र विधि पद्धतिलाई अवलम्बन गर्ने कुरा कमजोर हुँदा पार्टीभित्र अराजक अवस्था आएको हो माओवादीले स्वीकारेको छ । उपमहासचिव जनार्दन शर्माले अध्यक्ष प्रचण्डमाथि सार्वजनिक रुपमै गम्भीर प्रश्न उठाएको सन्दर्भमा यस्तो सर्कुलर माओवादीले जारी गरेको हो ।
माओवादीले नेकपा एमाले र नेपाली कांग्रेस मिलेर बनेको सरकारविरुद्ध जुनसुकै बेला सडक आन्दोलनमा जानुपर्ने निष्कर्ष पनि निकालेको छ ।
उसले नेता कार्यकतालाई आन्दोलनका लागि तयारी अवस्थामा रहिरहन पनि भनेको छ । माओवादीले प्रतिगमन, राष्ट्रघात र भ्रष्टहरूको संरक्षण गर्ने दिशामा सरकार अघि बढेमा सडक आन्दोलनमा जानुपर्ने भनेको छ ।
माओवादीले कांग्रेस–एमाले ७ बुँदे सहमतिलाई प्रश्चगामी र प्रतिगामी कदम भनेको छ ।
माओवादीले प्रतिगमन, राष्ट्रघात, भ्रष्टहरूको संरक्षणको विरोध र जनताका दैनिक समस्यालाई सदनमा सशक्त रुपमा उठाउने जनाएको ।
सदनमा खबरदारी गर्दा पनि सरकार प्रतिगमनतिर गएमा सडक आन्दोलनमा जानै पर्ने निष्कर्ष माओवादीको छ ।
‘कार्यदिशा अनुरूप कार्यक्रम र कार्यनीतिहरूलाई कार्यान्वयन गर्न मुख्यतः पार्टी सङ्गठनमा निर्भर रहन्छ । परन्तु: पार्टी सङ्गठनको क्षेत्रमा जुन गतिमा अगाडि बढ्नु पर्दथ्यो त्यस रूपमा अगाडि बढाउन सकेनौँ’, माओवादीले भनेको छ, ‘पार्टीमा व्यक्तिगत स्वार्थ, पद प्रतिष्ठा केन्द्रित प्रवृत्तिहरू बढ्न थाल्यो । त्यसले गर्दा निजी स्वार्थ समूहको गुट– उपगुटहरू क्रियाशील हुने जस्ता नकारात्मक चिन्तन प्रवृत्ति तथा गतिविधिहरू देखिए ।’
अध्यक्ष प्रचण्ड र महासचिव गुरुङले पठाएको परिपत्रमा विभिन्न स्वार्थ समूहको गुट–उपगुट सक्रिय रहेको स्वीकारिएको छ ।
प्रतिक्रिया