काठमाडौं– फिल्म ‘बेहुली फ्रम मेघौली’ को नयाँ गीत ‘उडायो मन’ सार्वजनिक भएको छ । निर्माण पक्षले शुक्रबार युटुबमार्फत गीत सार्वजनिक गरेको हो ।

यो गीत जयन जे वाइवाले तयार पारेका हुन् । गीतको सङ्गीतसँगै शब्द र ऐरेन्ज पनि वाइवाकै छ भने इन्द्रकला राईले स्वर दिएकी छन् ।

गीतमा नेपाली र थारु भाषाको मिश्रण छ । सो गीतका मूल सर्जक केशवराज महतो हुन् । थारु शब्दको पुनर्लेखन अशोक थनेतले गरेका हुन् ।

गीतको भिडियोमा सिनेमाकी शीर्ष अभिनेत्री स्वस्तिमा खड्काले मुख्य स्थान पाएकी छन् । सो गीतमा सिमरन खड्का तथा निश्चल बस्नेत फिचर्ड छन् । गीतको कोरियोग्राफी शेखर घर्ती मगरले गरेका हुन् ।

असोज १७ गते घटस्थापनाका दिन प्रदर्शनमा आउने यस फिल्ममा निश्चल, स्वस्तिमा, सिमरनसहित बसुन्धरा भुषाल, विजय बराल, लोकेन्द्र लेखक, रक्षा थापा, सिरु बिष्टलगायतको अभिनय रहेको छ ।

ब्ल्याक हर्स पिक्चर्स र मेघौली फिल्मस्को ब्यानरमा निर्माण भएको सिनेमामा साजन काफ्ले र आकाश बरालको लेखन तथा निर्देशन रहेको छ । यो उनीहरूको डेव्यू निर्देशन हो । अभिनेता विजय बराल कास्टिङ निर्देशक हुन् ।

यही फिल्ममार्फत स्वस्तिमाले निर्माणमा हात हलेकी छन् । स्वस्तिमा र निश्चलको जोडीको यस फिल्ममा लगानी रहेको छ । फिरोज खड्का र शंकर पाण्डे कार्यकारी निर्माता हुन् ।

हेर्नुहोस् गीत :