काठमाडौं- नेपाली कांग्रेसका नेता नैनसिंह महरले नवगठित सरकारका मन्त्रीहरूलाई सिंहदरबारमा खादा, माला र बधाई थाप्नुभन्दा बाढीपहिरोबाट प्रभावितको उद्धारमा खट्न आग्रह गरेका छन्।

काठमाडौंमा आयोजित कार्यक्रममा सञ्चारकर्मीसँग कुरा गर्दै नेता महरले मन्त्री नियुक्त भएको हप्तौँसम्म खादा र मालामै व्यस्त भएर समय खेर फाल्नु गलत भएको बताए ।

‘सिंहदरबार कामकाजी अड्डा हो। त्यसलाई त्यहीअनुरूप प्रयोग गर्नुपर्छ। मन्त्रालयबाट जनताको काम गर्नुपर्छ। सम्मान थाप्ने रहर भए निजी निवासमा बोलाउँदा हुन्छ’, उनले भने, ‘जनता विपद्को सामना गरिरहेका बेला सरकार राहत तथा उद्धारमा सक्रिय हुनुपर्छ ।’

महरले नयाँ सरकारलाई हिजोको जस्तो गल्ती गर्ने छुट नभएको बताएका छन्। जनअपेक्षा र आफ्नो प्रतिबद्धताअनुरूप सरकारमा सहभागी दुई ठूला दल कांग्रेस-एमालेले काम गर्नुपर्ने उनको धारणा छ।

‘नयाँ सरकार निर्माण हुँदै गर्दा भएको राजनीतिक सम्झौता अनुसार काम गर्नुपर्छ। भ्रष्टाचार अन्त्य, सुशासन, दिगो विकास, आर्थिक सुदृढीकरण, समृद्धि र जनताको जनजीविकाका सवालमा सरकार गम्भीर हुनुपर्छ’, उनले भने,‘युवालाई देशमै रोकेर उनीहरूको श्रम देश निर्माणमा सदुपयोग गर्नेतर्फ सरकार जिम्मेवार हुनुपर्छ।’

दुई ठूला दल एक ठाउँमा आउँदा जनतामा आसा जागेको र जनअपेक्षा अनुसार काम गर्न नसकेमा कांग्रेस-एमालेप्रति वितृष्णा पैदा हुने उनको चिन्ता छ।

देश बाढीपहिरोबाट प्रभावित भएर कयौं जनताले ज्यान गुमाउनु परेको र हजारौं बिस्थापित भएको अवस्थामा सरकार पूर्ण रुपले राहत तथा उद्धारमा केन्द्रित हुनुपर्ने उनले बताए।