काठमाडौं- सहकारी ठगी प्रकरणले अप्ठेरो परेपछि राष्ट्रिय स्वतन्त्र पार्टीका सभापति रवि लामिछानेले प्रजातन्त्रिक गठबन्धनका लागि डा. स्वर्णिम वाग्लेलाई दूतका रुपमा नेपाली कांग्रेसकहाँ पठाएको दाबी महामन्त्री गगन थापाले गरेका छन् ।

उनले संसद् भवन नयाँबानेश्वरमा पत्रकार सम्मेलन गर्दै उपप्रधानमन्त्री लामिछानेलाई जवाफ दिएका हुन् ।

जवाफ दिने क्रममा थापाले नेकपा एमाले र माओवादी केन्द्र नेतृत्वको अहिलेको गठबन्धन छाडेर कांग्रेससँग मिल्ने गरी स्वर्णिमलाई दूतका रुपमा पठाएको खुलासा गरेका हुन् ।

‘दुई दिनअघि एकजनालाई उहाँले डेमक्रेटिक एलायन्स बनाउन भन्दै दूतका रुपमा पठाउनु भयो’, थापाले भने, ‘यसपहिले कांग्रेसमा रहेका ती नेता हाम्रा नेताका घरघरमा प्राजतन्त्रिक गठबन्धन बनाउन हामी खुला छौँ भनेर आउनु भएको थियो । यहाँभन्दा धेरै म भन्दिनँ ।’

उनले पत्रकार सम्मेलनका क्रममा स्वर्णिम वाग्लेको नाम लिएनन् तर उनी दुई दिनअघि आएको भने बताए । ‘उहाँले कांग्रेस नेताहरूसँग हामीलाई एमालेसँगै टाँसिने नबाइदिनुस् भन्नु भयो’, उनले भने, ‘सहकारीमा धेरै नपेल्नुस्, भित्तामा नपुर्‍याउनुस् भनेर आग्रहसहित कांग्रेससँग मिल्ने कुरा गर्नु भयो ।’