काठमाडौं- नेपाली कांग्रेसका महामन्त्री गगनकुमार थापाले उपप्रधान तथा गृहमन्त्री रवि लामिछानेले संसद्‍मा केटाकेटीपन देखाएको बताएका छन् ।

आइतबार साँझ बसेको प्रतिनिधि सभाको बैठक गृहमन्त्री लामिछानेले स्पष्टीकरण दिएपछि आयोजित पत्रकार सम्मेलनमा थापाले यसो भनेका हुन् ।

लामिछानेले हिजो टेलिभिजन प्रस्तोता हुँदाको जस्तै बोलेर संसद्, पत्रकार र नेपाली जनतालाई बहकाउने काम गरेको बताए ।

‘कुनैबेला एकजना टेलिभिजन प्रस्तोता थिए, कहिले नाकको डाँडी भाँच्छु भन्थे, कहिले ठूलोठूलो स्वरले चिच्याउँथे’, उनले भने, ‘म आज गृहमन्त्री हो कि टेलिभिजन प्रस्तोता संसद्‍मा बोलेको हो झुक्किएँ ।’

‘उहाँमा टेलिभिजन प्रस्तोता हुँदा एउटा कुरा तर अब गृहमन्त्री रुपमा ठूलो जिम्मेवारी छ । म तेरो फाइल खोल्दिऊँ, अनुसन्धान गरिदिऊँ भन्ने होइन’, उनले भने, ‘गृहमन्त्रीले त्यसो भन्ने होइन, धमाधम अनुसन्धान गर्ने हो।’

थापाले आफू प्रसूती गृहमा जन्मिएको बताउँदै त्यहीँदेखि अनुसन्धान गरे हुने बताए । उनले आफूले विदेशलाई सूचना बेचेको भनेर लगाइएको आरोपलाई केटाकेटीपनको संज्ञा दिए ।