काठमाडौं- अन्तर्राष्ट्रिय आप्रवासी दिवसका अवसरमा बुधबार काठमाडौंमा दीप प्रज्ज्वलन गरिएको छ।

वैदेशिक रोजगारीमा गएर जीवन गुमाएका नेपालीहरूको सम्झनामा दीप प्रज्वलन गरिएको हो ।

आप्रवासनका क्रममा ज्यान गुमाएका १४ हजार २२४ नेपाली कामदारलाई श्रद्धाञ्जली दिन भृकुटीमण्डपमा दीप प्रज्वलन गरिएको हो ।

प्रवासी नेपाली कोअर्डिनेशन कमिटी, सुरक्षित अध्यागमनको लागि राष्ट्रिय सञ्जाल र श्रम तथा रोजगार मन्त्रालयद्वारा गठित अन्तर्राष्ट्रिय आप्रवासन दिवस २०२४ को मूल समारोह समितिले द्वीप प्रज्ज्वलन गरेका हुन् ।

नेपाली श्रमिकको विदेशमा मृत्यु हुने संख्या डरलाग्दो छ । पछिल्लो १० वर्षमा १० हजारभन्दा बढी नेपालीले विदेशमा ज्यान गुमाएका छन् ।

अन्तर्राष्ट्रिय प्रवास श्रमिक दिवसमा जिफन्टले निकालेको तथ्यांक अनुसार आर्थिक वर्ष २०७१/७२ देखि २०८०/८१ सम्म अर्थात् १० वर्ष अवधिमा वैदेशिक रोजगारी क्रममा १० हजार २ सय ७४ नेपालीले ज्यान गुमाएका छन् ।

गत आवमा मात्र १ हजार ४ सय ९२ नेपाली श्रमिकले ज्यान गुमाए। ५ सय ७८ जना अंगभंग भई स्वदेश फर्किएको वैदेशिक रोजगार बोर्डले जनाएको छ।

२०७१/७२ मा ६ महिला र १ हजार पुरुषको प्रवासमा ज्यान गएको थियो । २०७२/७३ मा २४ महिला र ७ सय ८९ पुरुष गरी ८१३ को मृत्यु भएको देखिन्छ । २०७३/७४ मा १८ महिला र ७ सय ३७ पुरुष गरी प्रवासमा ७ सय ५५ जनाको ज्यान गएको थियो ।

तस्बिरहरू : नेपाल फोटो पुस्तकालय