काठमाडौं- राष्ट्रिय सभाबाट बेपत्ता पारिएका व्यक्तिहरूको छानबिन, सत्य निरुपण तथा मेलमिलाप आयोग (तेस्रो संशोधन) विधेयक २०७९ माथि विचार गरियोस् भन्ने प्रस्ताव सर्वसम्मतिले स्वीकृत भएको छ ।

आइतबार सरकारको तर्फबाट कानुन, न्याय तथा संसदीय मामिलामन्त्री अजयकुमार चौरसियाले प्रतिनिधिसभाबाट पारित भएर सन्देशसहित पुगेको उक्त विधेयक राष्ट्रिय सभामा पेस गरेका थिए ।

कानुनमन्त्री चौरसियाले नेपालका कहिले पनि द्वन्द्व नदोहोरिन दिन, सबैलाई मान्य हुनेगरी शान्ति स्थापना होस् भनेर विधेयक ल्याइएको बताए ।

उनले विधेयक ऐनका रुपमा परिणत भइसकेपछि पारदर्शी ढंगले दुवै आयोग बन्ने बताए । उनले टीआरसी विधेयक राष्ट्रिय सभाले सर्वसम्मतिले पारित गर्ने विश्वास जनाएका छन् ।

त्यसपछि राष्ट्रिय सभा अध्यक्ष नारायण दाहालले टीआरसी विधेयकमाथि विचार गरियोस् भन्ने प्रस्ताव सर्वसम्मतिले स्वीकृत भएको घोषणा गरे । विधेयकमाथि संशोधन प्रस्ताव राख्न चाहने सांसदहरूले राष्ट्रिय सभाअन्तर्गतको विधेयक शाखामा संशोधन प्रस्ताव दर्ता गराउन सकिने उनले जानकारी दिए ।