काठमाडौं– इटालियन सिरी ‘ए’ फुटबलमा एसी मिलान र टोरिनोले बराबरी खेलेका छन् ।

शनिबार राति भएको खेलमा दुवै टोलीले २–२ गोलको बराबरी खेल्दै अंक बाँडेका छन् ।

एसी मिलानका लागि अल्भारो मोराटा र नोआ ओकाफरले गोल गरेका थिए । यस्तै, टोरिनोका लागि डुभान जोपाटाले एक गोल गर्दा अर्को एक गोल आत्मघाती उपहार स्वरुप प्राप्त भएको थियो ।

खेलको ३०औं मिनेटमा एसी मिलानका मलिक थिअवले आत्मघाती गोल गरेपछि टोरिनोले सुरुवाती अग्रता लिएको थियो । यस्तै ६८औं मिनेटमा जोपाटाले गोल गर्दै मिलानको अग्रतालाई दोब्बर बनाए ।

खेलको ८९औँ मिनेटमा मोराटाले गोल गर्दै एसी मिलानलाई २–१ को स्थितिमा ल्याए । यस्तै, इन्जुरी समयमा ओकाफरले गोल गर्दै एसी मिलानलाई हारबाट जोगाउँदै टोरिनोसँग २–२ गोलको बराबरी गरे ।

सिरी ‘ए’ अन्तर्गत शनिबार नै भएका अन्य खेलमा इम्पोली र मोन्जाले गोलरहित बराबरी खेल्दा इन्टर मिलान र जिओनाले २–२ तथा फियोरेन्टिना पार्माले १–१ गोलको बराबरी खेले ।