काठमाडौं– मानव बेचबिखन अनुसन्धान ब्युरोको  टोलीले मानव बेचबिखन मुद्दाका फरार प्रतिवादीलाई ३२ वर्षपछि पक्राउ गरी आज सार्वजनिक गरेको छ ।

पक्राउ पर्नेमा धादिङ मेत्रावती गाउँपालिका-२ घर भएका ५७ वर्षीय वीरबहादुर तामाङ रहेको ब्युरोका प्रवक्ता तथा प्रहरी उपरीक्षक कृष्णप्रसाद पँगेनीले जानकारी दिए।

उनका अनुसार प्रतिवादी तामाङले एक महिलालाई ब्रुनाई पठाइदिने भनी झुक्याई २०४७ साल चैत्र ३ गते काठमाडौँबाट काँकरभिट्टा हुँदै पश्चिम बङ्गालको बागडोग्रामा पुर्‍याई भारतीय नागरिकलाई बेचेका थिए । निजलाई ब्युरोबाट खटिएको टोलीले यही माघ ३ गते ललितपुरबाट पक्राउ गरेको हो ।

पक्राउ परेका निज तामाङविरुद्ध मानव बेचबिखन तथा ओसारपसार मुद्दामा काठमाडौँ जिल्ला अदालतबाट तीन दिनको म्याद थप गरी आवश्यक अनुसन्धान भइरहेको प्रवक्ता तथा प्रहरी उपरीक्षक पँगेनीले बताए।