रुपन्देही – प्रधानमन्त्री कप एकदिवसीय क्रिकेट प्रतियोगितामा लगातार तेस्रो जित निकाल्दै सुदूरपश्चिम प्रदेश अंक तालिकाको शीर्ष स्थानमा उक्लिएको छ ।

लगातार तेस्रो जित निकाल्ने क्रममा सुदूरपश्चिमले गण्डकी प्रदेशमाथि १०८ रनको फराकिलो जित हात पार्‍याे । भैरहवाको सिद्धार्थ क्रिकेट एकेडेमीमा जितका लागि २०२ रनको लक्ष्य पछ्याएको गण्डकी ३०.२ ओभरमा ९३ रनमा अलआउट भयो ।

गण्डकीका अश्वानी रानाले २५ र कमल परियारले २२ रन बनाए । अन्य कुनै पनि ब्याट्सम्यानले दोहोरो अंकमा रन बनाउन सकेनन् ।

सुदूरपश्चिमका मल्ल एक्लैले ५ विकेट लिए । ८.२ ओभर बलिङ गरेका उनले १ मेडन राख्दै २३ रन दिएर ५ विकेट लिएका हुन । सुदूरपश्चिमका गजेन्द्र बोहराले २ र भोजराज भट्ट, नरेन साउद र मिलन बोहराले समान १-१ विकेट लिए ।

त्यसअघि पहिला ब्याटिङ गरेको सुदूरपश्चिमले ५० ओभरमा अल आउट हुँदै २०१ रन बनाएको थियो । सुदूरपश्चिमका लागि किरण ठगुन्नाले ६० रन बनाए । नारायण जोशीले ४६ रन जोडे ।

गण्डकीका कप्तान विपिन खत्री र अंकित न्यौपानेले समान ३-३ विकेट लिए । कमल परियार र अमृत गुरुङले २-२ विकेट लिए । प्रतियोगितामा गण्डकीको यो लगातार तेस्रो हार हो ।