काठमाडौं– राष्ट्रिय स्वतन्त्र पार्टीका उपसभापति डा. स्वर्णिम वाग्लेले आफूहरू चीनले अघि सारेको बेल्ट एन्ड रोड इनिसियटिभ (बीआरआई) कै पक्षमा रहेको बताएका छन् ।

पार्टी कार्यलयमा च:मतीमा भएको पत्रकार सम्मेलनमा उनले बीआरआईबारे स्पष्ट निर्णय आउनुपर्ने बताएका छन् । वाग्लेले चीन र नेपाल दुवैतिरबाट स्पष्ट धारणा आइसकेपछि औपचारिक रुपमा बोल्ने पनि बताए ।

वाग्लेले बीआरआईको स्पष्ट खाका पहिले आउनुपर्नेमा जोड दिएका छन् ।

आगामी मंसिर १७ गते चीन भ्रमणमा जान लागेका प्रधानमन्त्री केपी शर्मा ओलीले बीआरआईबारे छलफल गर्ने चर्चाबीच वाग्लेलाई पत्रकारले यसबारे सोधेका थिए ।

‘हामी विपक्षमा छैनौँ । तर यसमा स्पष्टता चाहन्छौँ । तर अनुदान र ऋण के हो स्पष्ट धारणा आउनुपर्छ । बीआरआईबारे नेपालको धारणा हामीले थाहा पाउनुपर्छ’, उनले भने, ‘प्रधानमन्त्री ओलीले छलफलको प्रस्ताव ल्याउनु भएको छैन । हामी स्पष्ट धारणा कुरिरहेका छौँ । अनुदान र ऋण अन्तर्राष्ट्रिय रूपमा आएको छ । त्यसमा नेपालको ५०, ६० वर्षको अनुभव छ । यसबारे स्पष्ट धारणा आउनुपर्छ । बीआरआईको टीओआर के हो, थाहा हुनुपर्छ ।’

उनले देशको चौथो ठूलो दललाई सरकारले बीआरआईबारे स्पष्ट धारणा बताउनुपर्नेमा पनि जोड दिएका छन् ।