काठमाडौं- सहकारी ठगी प्रकरणमा नेपाली कांग्रेसको आयोजनामा बसेको प्रतिपक्षी दलहरूको बैठक सकिएको छ ।

सिंहदरबारमा बसेको उक्त बैठकमा सहभागी राष्ट्रिय प्रजातन्त्र पार्टी (राप्रपा) ले उपप्रधान तथा गृहमन्त्री रवि लामिछानेलाई संसद्‍मा बोल्न दिनुपर्ने प्रस्ताव गरेको छ ।

राप्रपाबाट सहभागी उपाध्यक्ष बुद्धिमान तामाङ र प्रमुख सचेतक ज्ञानेन्द्र शाहीले गृहमन्त्री लामिछानेले संसद्मा बोल्न पाउनुपर्ने आफ्नो पार्टीको प्रष्ट लाइन रहेको बताएका छन् ।

नयाँ बानेश्वरस्थित संसद् भवनभित्र कांग्रेस दलको कार्यालयमा बसेको प्रतिपक्षी दलहरूको बैठकमा संसदीय छानबिन समिति बन्नुपर्ने र गृहमन्त्रीले आफ्ना कुरा राख्नुपर्ने राप्रपाले उल्लेख गरेको हो ।

बैठकपछि सञ्चारकर्मीसँग कुराकानी गर्दै राप्रपाका प्रमुख सचेतक शाहीले भने गृहमन्त्रीलाई बोल्न दिनुपर्ने पक्षमा आफूहरू प्रष्ट रहेको उल्लेख गरे ।

‘राप्रपाको तर्फबाट गृहमन्त्रीलाई बोल्न दिनुपर्छ भन्ने माग राखेका छौँ। गृहमन्त्रीले बोल्न संसद्‍मा पाउनुपर्छ। छानबिन समिति बन्नुपर्ने कुरामा हामी पछि हट्दैनौँ’, उनले भने ।

संसद्‍मा गृहमन्त्रीको जवाफ सुनिसकेपछि चित्त नबुझे प्रतिवाद गर्न सकिने पनि उनले बताए । ‘गृहमन्त्रीको जवाफ सुनिसकेपछि चित्त नबुझे प्रतिवाद गर्ने कुरामा हामी प्रष्ट छौँ ।’, उनले भने।

बिहीबार बसेको संसद् बैठकमा कांग्रेस र एमाले सांसदहरूबीच हातहालाहाल र घम्साघम्सी भएको थियो । यस्तो अवस्थामा कांग्रेस संसदीय दलको बैठकपछि सभापति शेरबहादुर देउवाले विपक्षी दलहरूसँग रणनीतिका लागि बैठक राखेका थिए ।