काठमाडौं– सिने क्षेत्रमा दीपकराज गिरी र दीपाश्री निरौला (दीपक–दीपा)को जोडीको विशिष्ट स्थान छ । सानो पर्दादेखि ठूलो पर्दासम्म यो जोडीको सहकार्यले निरन्तरता पाएको छ । दर्शकको पनि राम्रो साथ पाएको कुरा उनीहरूले निर्माण गरेको फिल्म ‘छक्का पञ्जा’का श्रृंखलाले नै प्रष्ट पार्छ ।

छक्का पञ्जा १, २ र ३ दीपाले निर्देशन गरेकी हुन् । यी फिल्ममा दीपकको नाम नायक र निर्माताका भूमिका सीमित छ । सोही कारण यो टिमलाई दीपकले निर्देशन गरे पनि दीपाको नाम निर्देशकका रूपमा राखिएको फिल्म निर्माण गरिएको आरोप लागेको छ ।

नेपाल अन्तर्राष्ट्रिय फिल्म महोत्सवको ‘निर्देशक हराएको सूचना’ अन्तरक्रियामा दीपकले यो आरोप तथ्यहीन भएको दाबी गरे । यसरी टिप्पणी गर्नु निर्देशक प्रतिको अन्याय रहेको उनको ठहर छ ।

दीपक थप्छन्, ‘त्योसँग म सहमत छैन । यो कुरा चाहिँ निर्देशक प्रतिको अन्याय हो । दीपाजीको नाम मात्र हो दीपकले निर्देशन गर्छ भन्ने प्रतिक्रिया मैले पहिलादेखि नै सुन्दै आएको हुँ । यो कुराले दीपाजीलाई जति नराम्रो लाग्छ त्यो भन्दा बढी मलाई लाग्छ ।’

यद्यपि छायांकनमा क्रममा आफूले आवश्यक र विज्ञता राख्ने विषयमा निर्देशकलाई सल्लाह दिने आफ्नो बानी रहेको उनले बताए ।

उनले थपे, ‘सिनेमा भनेको सामूहिक कार्य हो । हाँक्ने काम निर्देशक हो । फिल्म राम्रो होस् भनेर म दीपा जी होस् वा अन्य निर्देशक सबैलाई म सल्लाह दिइरहन्छु । राख्ने–नराख्ने उहाँहरुको विचार हो । म चाहिँ कुनै दृश्यका बारेमा फरक सोच आयो भने निर्देशकलाई भन्छु, तर हस्तक्षेप गर्ने होइन ।’

तस्बिर : चिरायु शाक्य