काठमाडौं – नेकपा एकीकृत समाजवादीले महासचिव घनश्याम भुसालले तयार पारेको कार्ययोजना प्रस्ताव पारित गरेको छ । गत बुधबारदेखि जारी स्थायी कमिटी बैठकले सो प्रस्ताव पारित गरेको हो ।

बैठक भोलि पनि जारी रहने छ । भोलिको बैठकमा केन्द्रीय पदाधिकारी र नेताहरूको कार्यविभाजन हुने बताइएको छ ।

यस्तै बैठकले तत्काल कुनैपनि कम्युनिष्ट पार्टीसँग एकता नगर्ने निर्णय गरेको छ । पार्टी प्रवक्ता जगन्नाथ खतिवडाले राष्ट्रिय एजेण्डाहरुमा सहकार्यको सम्भावना सधैं जीवित रहेपनि पार्टी एकताको सम्भावना नरेहको बताए । राष्ट्रिय एजेण्डाहरुमा सहकार्य गर्नको लागि पार्टी सधैं तयार रहेको समेत उनको भनाइ थियो ।

उनले बैठक अगामि निर्वाचनहरुमा नेकपा (एकीकृत समाजवादी)लाई सशक्त प्रतिस्पर्धी पार्टीको रुपमा उभ्याउने र कलम चिन्हका उम्मेदवारहरुलाई देशभरि स्थापित गर्नेबारे केन्द्रित रहेको बताए ।