एजेन्सी– कोमोरियन-ध्वजासहितको एक तेल ट्यांकर सोमबार ओमान नजिक पल्टिँदा चालक दलका १६ सदस्य बेपत्ता भएका छन् ।

बेपत्ता चालक दलका सदस्यको खोजी जारी रहेको सल्तनतको सामुद्रिक सुरक्षा केन्द्र (एमएससी) ले बताएको छ ।

ओमानको रक्षा मन्त्रालयद्वारा सञ्चालित एमएससीले जहाज पल्टिनुको कारण बताएको छैन ।

सामाजिक सञ्जालमा गरिएको एक पोस्टमा भनिएको छ, ‘एउटा कोमोरोस ध्वजाङ्कित तेल ट्यांकर सोमबार रास मद्रकाहबाट २५ माइल दक्षिणपूर्वमा डुक्मको बन्दरगाह सहर नजिकै पल्टियो ।’

धेरै विवरण उल्लेख नगरी पोस्टमा खोज र उद्धार कार्यहरू सम्बन्धित अधिकारीहरूबाट सुरु गरिएको बताइएको छ । 

मंगलबारको विज्ञप्तिमा एमएससीले जहाजको पहिचान प्रेस्टिज फाल्कनका रूपमा पहिचान गर्दै जहाजमा १३ भारतीय र तीन श्रीलंकालीसहित १६ जना चालक दलका सदस्य रहेको बताएको छ ।