काठमाडौं– राष्ट्रिय स्वतन्त्र पार्टीले प्रमुख प्रतिपक्षी नेपाली कांग्रेसको व्यवहारले संसदीय छानबिन समिति नबन्ने अडान सार्वजनिक गरेको छ ।

बिहीबार प्रतिनिधिसभा बैठकपछि सञ्चारकर्मीसँग कुराकानी गर्दै रास्वपा सांसद मनीष झाले अब समिति बन्न नसक्ने स्थिति आएको बताए ।

‘अब समिति बन्दैन, अघि हामीले दुई सर्त मान्दिनू, हामी समिति बनाउन तयार छौँ भनेका थियौँ । अब समिति बन्दै बन्दैन । समिति त्यो बेला मात्रै बन्छ, जब नेपाली कांग्रेस आफ्ना सभापति र पदाधिकारीहरूको फाइल खोल्न तयार हुन्छ’, झाले भने ।

झाले आफ्ना सभापति रवि लामिछानेमाथि लगाइएको सहकारी ठगी प्रकरण पुष्टि भएमा आफूहरू सबैले राजनीति छाड्न तयार रहेको पनि बताए ।
लामिछानेमाथि छानबिन गर्न अब पहिलो शर्त कांग्रेस सभापति शेरबहादुर देउवा परिवारको सम्पत्ति खोजबिन हुनुपर्ने उनको माग छ ।

‘अब समिति बन्दैन । अब समिति त्यो शर्तमा मात्रै बन्छ, म छातीमा हात राखेर भन्न सक्छु मेरो सभापतिको सबै छानबिन गर । तयार छु, हामी सबै राजनीति छोड्न तयार छौँ । उहाँको केही खोट निस्किए एक्लैले राजनीति छोड्छु भन्नु भएको छ, अब हामी सबै राजनीति छोड्छौ’, उनले भने, ‘के कांग्रेसका सबै सांसदले यो हिम्मत राख्न सक्छन् ? मेरो सभापतिको सबै छानबिन गर । कांग्रेस सभापति शेरबहादुर, उनका छोरा र श्रीमती (आरजु) को पनि गर । त्यो हिम्मत राख्नसक्छन् ? सक्छन् भने हामी च्यालेन्ज गर्छौं । अब समिति बन्दैन । समिति त्यो बेलामा मात्रै बन्छ, कांग्रेस पदाधिकारीका सबै फाइल खोल्न तयार हुन्छ । जसले हाम्रो सभापतिको फाइल खोज्न माग गर्दैछ, तपाईंको सभापतिको पनि फाइल खोल्नुस् ।’

कांग्रेसका सांसदहरूले नेकपा (एमाले) का अध्यक्ष केपी शर्मा ओलीमाथि दुर्व्यवहार गरेको भन्दै उनले आपत्ति जनाए ।

कांग्रेसले संसद्‍मा अभद्रता प्रदर्शन गरेको उनले बताए। ‘हात हालाहाल गर्ने ? त्यो पनि आफ्नो बुवाको उमेरको मान्छेलाई ? त्यो त मिल्दैन । संविधान बनाउँदै गर्दाका सहयात्री पनि त हुन्, २०६२/०६३ को सहयात्री पनि त हुन् । सबैभन्दा ठूलो दलको अभद्रता कल्पना पनि गर्न सकिँदैन,’ झाले भने ।