काठमाडौं– प्रमुख प्रतिपक्षी नेपाली कांग्रेसका नेताहरूले सत्ता पक्षीय दलहरूले बाटोमै कुरा फेरेको आरोप लगाएका छन् ।

बिहीबार बिहान प्रधानमन्त्री पुष्पकमल दाहाल प्रचण्ड संसदीय छानबिन समिति बनाउन तयार भइसकेको अवस्थामा दिउँसो भएपछि कुरा फेरेको कांग्रेस नेताहरूले बताएका छन् ।

सहकारी ठगी प्रकरण छानबिनका लागि कांग्रेस नेताहरूले लिखित सहमति समेत खेजेका छन् । त्यसपछि मात्रै संसद्‍को अवरोध हट्ने उनीहरूको अडानत छ ।

कांग्रेस सहमहामन्त्री बद्रीप्रसाद पाण्डेले भने, ‘बिहान सहमति भइसकेको थियो तर बाटोमै साथीहरूले कुरा फेर्नुभयो । अब हामीलाई संसद् खुलाउन सहकारी प्रकरणमा लिखित सहमति चाहिन्छ ।’

कांग्रेस नेताहरूले एमाले अध्यक्ष केपी शर्मा ओलीले उपप्रधान तथा गृहमन्त्री रवि लामिछानेको बचाउ गरिरहेकोसमेत बताएका छन् ।

कांग्रेसका एकजना संसद्ले भने, ‘छानबिन समितिलाई लिएर एमालेले व्यापक चलखेल गरिरहेको छ । यो गलत छ । हामी जनताको १ रुपैयाँ पनि तलमाथि हुन दिँदैनौँ ।’

यता सत्तारुढ नेकपा माओवादी केन्द्रका सांसद माधव सापकोटा ‘सुवोध’ले भने प्रधानमन्त्री प्रचण्डले संसद् सुचारु गराउन सबै दलसँग गम्भीर छलफल गरिरहेको बताएका छन् । उनले भने, ‘प्रधानमन्त्रीले निरन्तर पहल गरिरहनु भएको छ ।’

अहिले प्रधानमन्त्री प्रचण्डले उपप्रधान तथा गृहमन्त्री लामिछानेसँग छुट्टै छलफल गरिरहेका छन् ।

प्रधानमन्त्रीको सचिवालयका अनुसार एमाले अध्यक्ष केपी शर्मा ओलीसहितका शीर्ष नेताहरूसँग पनि सभामुख र प्रधानमन्त्रीले निरन्तर छलफल गरिरहेका छन् ।