काठमाडौं – गार्गी कन्या गुरुकुलको सहयोगार्थ काठमाडौँको पाशुपत क्षेत्रमा आयोजना भइरहेको महायज्ञमा हालसम्म रु ९८ लाख सङ्कलन भएको छ । महायज्ञको चौथो दिन आज रु ४२ लाख ८५ हजार सहयोग जुटेको छ ।

गुरुकुलका संस्थापक प्रमुख संरक्षक भगवती उपाध्यायले आज रु २५ लाख सहयोग गर्नुभएको छ । गुरुकुलमा अन्य दान दिने दाता थपिँदै गएका महायज्ञका कार्यक्रम संयोजक डा गोविन्द टण्डनले जानकारी दिए ।

सहयोग रकम थपिँदै गएको महायज्ञका सहसंयोजक टङ्कनाथ पौडेलले जानकारी दिए । आज गलेश्वर आश्रम देवघाटधामका पिठाधीश महामण्डलेश्वर १००८ स्वामी आत्मानन्द गिरीजी महाराजले प्रवचन दिएका थिए ।

यही फागुन १ गतेदेखि सुरु भएको उक्त महायज्ञमा पण्डित कुवेर सुवेदीले भागवत कथा वाचन गरेका थिए । कन्या गुरुकुललाई स्थापित गराउन अक्षयकोष स्थापना गर्ने उद्देश्यका साथ महायज्ञ आयोजना गरिएको हो ।

हाल गुरुकुलमा निःशुल्क आवासीय सुविधासहित कक्षा ५ देखि ११ सम्म ८० कन्या अध्ययनरत छन् । स्वर्गीय अङ्गुरबाबा जोशीको अगुवाइमा काठमाडौँमा २०६७ सालमा ग्रागी कन्या गुरुकुलको स्थापना गरिएको हो ।

विसं २०७५ देखि देवघाटधाममा पनि गार्गी कन्या गुरुकुल सञ्चालनमा छ । नेपालमा दुई सय ५० भन्दा बढी गुरुकुल दर्ता भए पनि एक सय ५० जति मात्र सञ्चालनमा रहेका राष्ट्रिय गुरुकुल शिक्षा परिषद् नेपालका केन्द्रीय उपाध्यक्ष गोदा सुवेदीले जानकारी दिए । सबैका लागि संस्कृत शिक्षा भन्ने मान्यताका साथ समावेशी गुरुकुल सञ्चालनमा छन् ।