काठमाडौं– सवारी दुर्घटनामा दुई जनाको मृत्यु भएको छ ।

तनहुँकाे शुक्लागण्डकी नगरपालिका-११ कालिकोटस्थित सडकमा गाछेपानीबाट चिसापानीतर्फ जाँदै गरेको ग.१ त २५३२ नम्बरको ट्याक्टर शुक्रबार बिहान दुर्घटना हुँदा ट्याक्टरमा सवार सोही नगरपालिका-२ गाछेपानी बस्ने २४ वर्षीय सोम बहादुर परियारको घटनास्थलमै मृत्यु भएको प्रहरीले जनाएको छ ।

हाल फरार ट्याक्टर चालकको प्रहरीले खोजी गरिरहेको छ ।

त्यसैगरी, रामेछापको मन्थली नगरपालिका-६ सेलेघाट सिल्लिबजारस्थित सडकमा बा.२ क ४५०७ नम्बरको टिपर अनियन्त्रित भई सडकबाट करिब १ सय ५० मिटर तल खसेर शुक्रबार बिहान दुर्घटना हुँदा चालक महोत्तरी बर्दिबास नगरपालिका-४ गौरीडाँडा घर भएका ५० वर्षीय जय बहादुर माझीको घटनास्थलमै मृत्यु भएको छ ।

दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।