काठमाडौं– नेपाल स्केटिङ तथा स्केटबोर्डिङ संघको आयोजनामा भएको तेस्रो राष्ट्रिय फ्रीस्टाइल रोल्लर स्केट प्रतियोगिताका विजयी खेलाडीलाई नगद पुरस्कार, ट्रफी, मेडल र प्रमाणपत्र प्रदान गरिएको छ ।

आइतबार सम्पन्न दुई दिने पुरुष र महिलातर्फका खेलाडीलाई राष्ट्रिय खेलकुद परिषद्का सदस्य सचिव टंकलाल घिसिङले नगद पुरस्कार र मेडल प्रदान गरे ।

उक्त अवसरमा नेपाल क्लाइम्बिङ संघका केन्द्रीय अध्यक्ष रमेश पौडेल लगायत उपस्थित थिए ।

फ्री स्टाइल रोल्लर स्केट च्याम्पियनसिप वार्षिक रुपमा आयोजना हुँदै आएको छ । यसपटक महिलातर्फ निर्जला श्रेष्ठ पहिलो, सन्ध्या मगर दोस्रो र निमिषा तामाङ भए । १५० महिलाबाट छनोट भएका १० जनाले तेस्रो राष्ट्रिय फ्री स्टाइल रोल्लर स्केट च्याम्पियनसिप भाग लिए ।

पुरुषतर्फको खेलमा राजन मग्राती पहिलो, सोहन गुरुङ दोस्रो र रोहन कुँवर तेस्रो भए । यस्तै पुरुषतर्फबाट तेस्रो राष्ट्रिय फ्री स्टाइल रोल्लर स्केट च्याम्पियनसिपमा २५० जना छनोट चरणमा सहभागी थिए । तीमध्ये ४० जनाले प्रतिस्पर्धा गरेको आयोजक संघका केन्द्रीय महासचिव सत्य थापाले बताए ।

काठमाडौंको गल्फुटार भएको प्रतियोगितामा प्रथम हुनेले १५ हजार, द्वितीयले १० हजार र तृतीयले पाँच हजारसहित ट्रफी, मेडल तथा प्रमाणपत्र पाए ।

विजेतालाई दक्षिण कोरियामा जुनमा हुने एसियन रोल्लर डारबी प्रतियोगितामा सहभागी गराइने संघका अध्यक्ष अच्युत खनालले बताए ।