काठमाडौं– स्पेनिस ला लिगा फुटबल अन्तर्गत रायो भ्यालेकानोले साबिक विजेता रियल म्याड्रिडलाई बराबरीमा रोकेको छ ।

आज बिहान सकिएको खेलमा ३–३ गोलको बराबरी खेल्दै भ्यालेकानोले रियललाई बराबरीमा रोक्दै अंक बाँडेको छ ।

भ्यालेकानोका लागि लोपेज, मुमिन र पालाजोन तथा रियल मड्रिडका भाल्भार्डे, बेलिंघम र रोड्रिगोले एक–एक गोल गरेका थिए ।

भ्यालेकानेका लोपेजले खेलको चौथो मिनेटमा सुरुवाती गोल गरेका थिए । ३६औँ मिनेटमा मुमिनले गोल गर्दै भ्यालेकानोको अग्रतालाई दोब्बर बनाए ।

त्यसपछि ३९औँ मिनेटमा भाल्भार्डे र ४५औँ मिनेटमा बेलिंघमले गोल गर्दै खेललाई २–२ गोलको बराबरीमा ल्याए ।

यस्तै, रियलका रोड्रिगोले ५६औँ मिनेटमा गोल गर्दै खेललाई ३Þ–२ को अवस्थामा ल्याए पनि ६४औँ मिनेटमा भ्यालेकानोका पालाजोनले गरेको गोलसँगै रियल मड्रिड ३–३ गोलको बराबरीमा रोकिन बाध्य भयो ।

यो बराबरीसँगै रियल १७ खेलबाट ३७ अंकसहित दोस्रो स्थानमा छ भने भ्यालेकानो १६ खेलमा २० अंकसहित १३औँ स्थानमा छ। १७ खेल खेलेको बार्सिलोनाको ३८ अंक छ।