काठमाडौं- नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले निरंकुशता र प्रतिगमनतर्फ फर्कने कसरतका विरुद्ध परिवर्तनका हिस्सेदार शक्तिहरु एकताबद्ध भएर प्रतिवाद गर्नुपर्ने बताएका छन् ।

नेपाल राष्ट्रिय प्राध्यापक संगठनका पूर्व केन्द्रीय संयोजक अखिलेश्वरलाल दासको दोस्रो स्मृति दिवस तथा उनको स्मृतिमा प्रकाशित ‘स्मृतिमा अखिल सर’ विमोचन कार्यक्रमलाई सम्बोधन गर्दै उनले यस्तो बताएका हुन् ।

‘हामी आज देख्छौं समाजलाई अराजकता र निरंकुशतातिर फकाउने कसरतहरु भइरहेका छन्’, उनले भने, ‘एकातिर हामीले स्थापित गरेको संघीय लोकतान्त्रिक मूल्य मान्यताबाट पछि हट्न खोज्ने हामीभित्रै कसैको मनशाय छ भने त्यसलाई पनि सफल हुन दिनु हुँदैन भने अर्कोतिर अराजकतावादीले जनतामा देखिएको निराशा र आवेगलाई दुरुपयोग गरेर प्रतिक्रान्ति गर्ने सपना पनि देखिरहेका छन् । त्यसैले दुवैतर्फ सचेत भएर अगाडि बढ्नुपर्ने आवश्यकता छ ।’

साँचो अर्थमा लोकतान्त्रिक गणतन्त्रप्रति प्रतिवद्ध शक्तिहरु सजग रहनुपर्ने प्रचण्डले जोड दिए ।

‘हिजो पनि संविधानमाथि बलात् आक्रमण गरेर दुईदुईपटक संसद विघटन गर्ने प्रवृत्तिलाई हामी वामपन्थी लोकतान्त्रिक शक्तिहरू मिलेर परास्त गरेका थियौँ, फेरि पनि संविधान मिच्ने, संसद् विघटन गर्ने हर्कत हुनसक्छन्, यस्ता हर्कतविरुद्ध अझै पनि सतर्क रहनुपर्छ’, उनले भने ।