काठमाडौं- कलाकार माओत्से गुरुङ अभिनित फिल्म ‘अग्निदहन’ मंसिर ७ गतेबाट प्रदर्शनमा आउँदैछ । उनी यस फिल्ममा ‘धामी’को भूमिकामा रहेको ट्रेलरबाट थाहा पाउन सकिन्छ ।

माओत्से सहायक भूमिकामा रुचाइएका कलाकार हुन् । यस फिल्ममा पनि उनी सहायक भूमिकामा नै छन् । तर, यसअघि सकारात्मक भूमिकामा देखिने उनी यसपटक भने खलपात्रको भूमिकामा छन् । धामी बनेर ‘बोक्सी’लाई यातना दिइएको ट्रेलरको दृश्यले यो स्पष्ट हुन्छ ।

फिल्ममा नकारात्मक पात्र निर्वाह गरे पनि दर्शकले मन पराउनेमा उनी आशावादी छन् । नकारात्मक पात्र निर्वाह गर्दा आफ्नो वास्तविक चरित्रमा असर पर्दैन भन्ने प्रश्नमा उनको जवाफ छ, ‘म कलाकार हुँ । फिल्म अथवा नाटकमा अभिनय गर्दा म सकारात्मक र नकारात्मक यस्तै भूमिका गर्छु भनेर कहिल्यै रोज्दिनँ । मेरो भूमिकाले फिल्म वा नाटकलाई कस्तो प्रभाव पार्छ त्यो हेर्छु ।’

चरित्र निर्माणबारे माओत्सेले केही कुरा सेयर गरेका छन् । बाल्यकालदेखि अहिलेसम्मका धामीहरूबाट प्रभावित यस फिल्मको चरित्र विकास गरेको उनले सुनाए । भन्छन्, ‘म गाउँमा जन्मेर हुर्केको मान्छे । धामी झाँक्री र बोक्सीका थुप्रै घटनाहरू देखेको थिएँ । मैले देखेका तिनै धामीबाट क्यारेक्टर निकालेको हुँ ।’

बुवासमेत सामान्य झारफुक गर्ने भएकाले चरित्र निर्माणमा थप सहयोग पुगेको उनले सुनाए । भने, ‘बुवाले सामान्य झारफुक गर्ने भएकाले चरित्र निर्माणमा सहयोग भयो । यसै पनि देखिरेहेकै पात्र भएकाले चरित्र निर्माणका लागि मैले धेरै अध्ययन र खोज गर्नुपरेन ।’