काठमाडौं- काठमाडौं महानगरपालिकाको नगर प्रहरी बल र स्थानीयबीच गौशालामा तनाव भएको छ ।

गौशाला चोकस्थित फुटपाथ मिचेर बनाइएको संरचना भत्काउन डोजरसहित महानगर प्रहरीको टोली पुगेपछि मारवाडी सेवा समितिका र स्थानीय सडकमा उत्रिँदा तनाव भएको हो ।

अदालतको आदेशपछि माडवाडी सेवा समितिले सञ्चालन गर्दै आइरहेको गौशाला धर्मशाला खाली गराउन र फुटपाथ मिचिएको संरचना भत्काउन नगर प्रहरी गौशाला पुगेको थियो ।

अतिक्रमित संरचना भत्काउन खोज्दा स्थानीयले अवरोध गरेपछि दुई पक्षबीच धकेलाधकेल भएको छ ।

त्यसक्रममा स्थानीयले अदालतको आदेशविपरीत महानगरपालिकाले मनपरी गर्न खोजेको आरोपसहित आक्रोश व्यक्त गरे । महानगरले डोजर चलाए त्यहीँ ढुंगामुढा गर्ने धम्की स्थानीयले दिए ।

काठमाडौं जिल्ला अदालतले २१ वर्षदेखि मारवाडी सेवा समितिले चलाउँदै आएको पशुपति क्षेत्र विकास कोषको स्वामित्वको पशुपति गौशाला धर्मशालाको जमिनमा मोहियानी हक नलाग्ने फैसला गरिसकेको छ ।

त्यसपछि महानगरको टोली मारवाडी सेवा समितिले ओगेटको त्यो संरचना खाली गराउन पुगेको थियो । स्थानीय र माडवाडी समितिको अवरोधबीच महानगरले डोजर चलाएको छ ।

पशुपति विकास कोषले धर्मशाला सञ्चालन गराउने जिम्मा काठमाडौं महानगरपालिकालाई दिएको थियो । त्यसपहिले तत्कालीन संस्कृति मन्त्री सुदन किरातीको पालामा धर्मशाला मारवाडीबाट खोसिएको थियो।

तस्बिरहरू : नेपाल फोटो पुस्तकालय