काठमाडौं- भुमिगतकालदेखि नै डा‍‍‍. बाबुराम भट्टराईलाई स्वकीय सचिवका रुपमा साथ दिँदै आएका विश्वदीप पाण्डे माओवादी केन्द्रमा प्रवेश गरेका छन् ।

लामो समय बाबुराम भट्टराईका दुःख–सुखमा साथ दिँदै आएका पाण्डे माओवादी अध्यक्ष प्रचण्डसँग हात मिलाएर माओवादीमा फर्केका हुन् ।

रुपन्देही निवासी पाण्डे किशोरावस्थादेखि नै माओवादी आन्दोलनमा लागेका थिए । विश्वदीपका पिता भक्ति पाण्डेले डा। बाबुरामसँग छोराको चिनजान गराइदिएका थिए । माओवादी जनयुद्धका बेला जोखिपूर्ण सवारी चलाएर साथ दिएका भक्तिको निधन भइसकेको छ ।

बाबुरामसँगको लामो सहकार्य छाडेर माओवादीमा फर्कने क्रममा विश्वदीप पाण्डेले डा. भट्टराईको नाम नलिइकन सामाजिक सञ्जालमा यस्तो स्टाटस लेखेका छन्–

केही वर्षको उतारचढाव, आफ्नै प्रकारका भोगाई र अनुभूतिसँगै म नेकपा माओवादी केन्द्रमै फर्किएको छु । माओवादी पार्टी र अध्यक्ष कमरेड प्रचण्डसँगको सहकार्य मेरा लागि कुनै नयाँ कुरा हैन । यहाँ मेरा लागि पहिलेकै जस्तो प्रेम, स्नेह र सद्भाव छ भन्ने पूर्ण विश्वास छ ।

सुशासन, समृद्दि, सामाजिक न्याय र समाजवादको यात्रा टुटेर, फुटेर अथवा छुट्टाछुट्टै हिँडेर पूरा गर्न नसकिने रहेछ । आज देशलाई वामपन्थी शक्तिबीच नयाँ स्तरको एकता र सहकार्य चाहिएको छ । अझ हिजोका क्रान्तिकारी शक्तिहरु सबै प्रकारका पूर्वाग्रहबाट माथि उठेर एकताबद्व हुनु झनै आवस्यक छ ।

यो क्षण म केही भावुक पनि भएको छु । कतिपय पुराना र पेचिला स्मरण जीवन्त भएर आएका छन् । यो पार्टी र आन्दोलनको निर्माणमा मेरो बुबाको सम्पूर्ण जीवन नै समर्पित भयो । म आफूले यसमा सक्दो भूमिका र योगदान गरेँ ।

कतिपय राजनीतिक घटनाक्रमको जटिलताले हामी केही टाढा÷नजिक भयौं होला तर, भविष्यका नयाँ चुनौती पूरा गर्न यो पार्टी र आन्दोलनलाई नयाँ स्तर र उचाईमा उठाउन योगदान गर्नुपर्छ भन्ने निष्कर्षमा पुगेर फेरि यात्रामा लामवद्ध भएको छु ।