काठमाडौँ– स्पेनिस सुपर कप फुटबलको उपाधि रियल मड्रिडले जितेको छ । गएराति भएको फाइनल खेलमा बार्सिलोनालाई ४–१ गोलले हराउँदै रियलले उपाधि जितेको हो ।

स्पेनिस सुपर कपमा रियलको यो १३औँ जित हो । बार्सिलोनाले सर्वाधिक १४ पटक जितेको छ ।

रियलका लागि भिनिसियस जुनियरले ह्याट्रिक गरेका थिए भने एक गोल रोड्रिगोले थपेका थिए । यस्तै, पराजित भएको बार्सिलोनाका लागि रोबर्ट लेवान्डोस्कीले एक गोल फर्काएका थिए ।

खेलको सातौँ मिनेटमा भिनिसियसले रियल मड्रिडलाई सुरुवाती अग्रता दिलाएका थिए । यस्तै, उनले नै १० मिनेटमा अर्को गोल गर्दै टोलीको अग्रतालाई दोब्बर बनाए ।

त्यसपछि ३३औँ मिनेटमा बार्सिलोनाका लागि लेवान्डोस्कीले एक गोल फर्काउँदै खेललाई २–१ को अवस्थामा ल्याए ।

तर यसको ६ मिनेट नबित्दै ३९औँ मिनेटमा भिनिसियसले पेनाल्टीमार्फत ह्याट्रियक पूरा गर्दै टोलीलाई ३–१ को अग्रता दिलाए ।

यसैगरी, खेलको ६४औँ मिनेटमा रोड्रिगोले एक गोल थप्दै रियल मड्रिडको जितलाई झनै सहज बनाए ।

यो जितसँगै रियल मड्रिडले अघिल्लो वर्षको फाइनलमा बार्सिलोनासँग हारको बदला लिएको छ । सो फाइनलमा रियल ३–१ गोलले पराजित भएको थियो ।