काठमाडौं– नायक अनमोल केसीले फिल्म ‘फर्कीफर्की’का लागि लिएको पारिश्रमिकको कर नेपाल सरकारलाई बुझाएका छन् । फिल्म निर्माता रोहित अधिकारीका अनुसार अनमोलले गत बुधबार सात लाख ५० हजार रुपैयाँ कर तिरेका हुन्‌ ।

निर्माता अधिकारले आइतबार मात्रै अनमोलले कर तिरेको रसिद फेसबुकमार्फत सार्वजनिक गरेका हुन् । जसमा ५० लाख रुपैयाँ आम्दानीको १५ प्रतिशत टीडीएस तिरेको देख्न सकिन्छ ।

निर्माता अधिकारी भन्छन्, ‘कलाकारको पारिश्रमिक र करबारे पारदर्शीता होस् भनेर रसिद सार्वजनिक गरेको हौं ।’

यससँगै अनमोलले ५० लाख रुपैयाँ पारिश्रमिक लिएको पुष्टि भएको छ । यसअघि उनीमाथि चर्चाकै लागि मात्र बढी पारिश्रमिक लिएको हल्ला फैलाएको आरोप लाग्ने गरेको थियो ।

अनमोल एक फिल्मका लागि सो रकम बराबरको पारिश्रमिक लिएर कर तिरेको सार्वजनिक गर्ने पहिलो नायक बनेका छन् ।