काठमाडौं– सत्ता साझेदार दल नेकपा एमालेका अध्यक्ष केपी शर्मा ओली संघीय संसद्का दुवै सदनको संयुक्त बैठकमा अनुपस्थित देखिएका छन् ।

राष्ट्रपति रामचन्द्र पौडेलले संयुक्त बैठकमा सरकारको नीति तथा कार्यक्रम प्रस्तुत गरिरहँदा उनी अनुपस्थित देखिएका हुन् ।

बैठकमा सत्ता साझेदार र प्रतिपक्षमा रहेका दलका शीर्ष नेताहरू उपस्थित देखिए पनि पूर्व प्रधानमन्त्री ओली अनुपस्थित देखिँदा सामाजिक सञ्जालमा अनेक टिप्पणी भइरहेका छन् ।

उनी मंगलबार नै भृकुटी मण्डपमा भ्रातृ संगठन अनेरास्ववियुद्वारा आयोजित ‘विद्यार्थी महोत्सव–२०८१’ मा पनि अनुपस्थित थिए। यद्यपि, ओलीले मंगलबार बिहान आफू उक्त महोत्सवमा सहभागी हुन लागेको सामाजिक सञ्जालमा लेखेका थिए।

‘आज म विद्यार्थी महोत्सवमा जाँदैछु । यहाँ नयाँ पुस्ता र विद्यार्थीहरू के सोचिरहेछन् र के गरिरहेछन् भन्ने बुझ्न सजिलो हुने छ,’ अध्यक्ष ओलीले लेखेका थिए।

उनी स्वास्थ्यमा समस्या देखिएपछि उक्त महोत्सवमा उपस्थित हुन नसकेका बताइएको छ। अनेरास्ववियुका एक नेताका अनुसार महोत्सवको उद्घाटन समारोहमा स्वास्थ्यमा समस्या देखिएपछि अध्यक्ष ओली उपस्थित हुन नसकेको सार्वजनिक रुपमा जानकारी गराइएको थियो ।