विराटनगर– मोरङमा प्रहरीले गोली हानेर एक जना लागूऔषध कारोबारीलाई पक्राउ गरेको छ।  

जिल्ला प्रहरीका कार्यालय मोरङ प्रहरी नायब उपरीक्षक ज्ञानेन्द्र बस्नेतका अनुसार मोरङ रतुवामाई नगरपालिका ६ स्थित कादुपाढामा आज अपरान्ह प्रहरीले गोली हानी लागूऔषध कारोबारीलाई पक्राउ  गरेको हो । 

भारतीय नम्बर प्लेटको सुपर स्प्पेलन्डरमा लागूऔषध लिएर नेपाल प्रवेश गरेको सूचनाको आधारमा प्रहरीले रोक्ने क्रममा पेलेर अगाडि बढ्न खोजेपछि प्रहरीले गोली चलाएको थियो । 

लागूऔषध कारोबारी भारतको बिहार, किसनगञ्ज–८ बस्ने भारतीय नागरिक भागिरथ हरिजन घाइते भएका छन् ।उनलाई प्रहरीले नियन्त्रणमा लिएको प्रहरीको गोली उनको तिघ्रामा लागेको छ ।हाल उनको उर्लाबारीस्थित स्थानीय एक अस्पतालमा उपचार भइरहेको छ ।

भारतीय नागरिक  हरिजनको साथबाट प्रहरीले १ सय ५८ ग्राम ब्राउन सुगर बरामद गरेको छ ।