काठमाडौं – आगामी वर्षका लागि सरकारको नीति तथा कार्यक्रममा नेकपा (एमाले)का अध्यक्ष केपी शर्मा ओलीको ‘समृद्ध नेपाल सुखी नेपाली’ फर्किएको छ ।

तत्कालीन प्रधानमन्त्री ओलीले वि.सं. २०७५ मा नेपालको दीर्घकालीन सोच, २१०० (सन्‌ २०४३) जारी गर्दै आफूले लगाउँदै आएको ‘समृद्ध नेपाल सुखी नेपाली’ नारा मुलुकको योजनाभित्र समेटेका थिए ।

तर, दुईपटक संसद्‌ विघटन हुँदै एमाले प्रतिपक्षी बेञ्‍चमा थन्किएपछि पछिल्ला सरकारहरूले राज्यका सार्वजनिक नीतिमा ओलीको नारालाई समावेश गर्न छाडेका थिए ।

२०७९ फागुन १२ गते प्रधनमन्त्री दाहालले एमालेसँगको गठबन्धन भत्काएर कांग्रेसको सहयोगमा सरकारको नेतृत्व गरेपछि २०८० जेठ १ मा नीति तथा कार्यक्रम संसद्‌मा पेश गरेका थिए ।

सो दस्तावेजमा प्रतिनिधि तथा प्रदेश सभामा निर्वाचित हुने सदस्यलाई बधाई दिँदै ‘समृद्ध र समतामूलक नेपाल निर्माणको संकल्प’ पूरा गर्न कार्यकाल सफलताको कामना गरिएको थियो ।

तर प्रधानमन्त्री दाहालले फागुन २१ गते कांग्रेससँगको गठबन्धन भत्काएर पुनः एमालेसँग सत्ता साझेदारी गरेपछि प्रधानमन्त्री ओलीले अघि सारेका ‘समृद्ध नेपाल सुखी नेपाली’ नारा सरकारको नीति तथा कार्यक्रममा समावेश भएको हो ।

राष्ट्रपति रामचन्द्र पौडेलले वाचन गरिरहेका नीति तथा कार्यक्रममा ‘वर्तमान सरकार देशमा समाजवाद उन्मुख आर्थिक सामाजिक रूपान्तरणका लागि राजनीतिक स्थायित्व, सुशासन, विकास र सामाजिक न्यायसहित समृद्ध नेपाल सुखी नेपालीको राष्ट्रिय आकांक्षा पूरा गर्न प्रतिवद्ध छ,’ लेखिएको छ ।