काठमाडौं–सुदूरपश्चिम प्रदेश सरकारमा एकै पार्टीका दुई सांसदले मुख्यमन्त्रीमा दाबी पेस गरेका छन् । अध्यक्ष रन्जिता श्रेष्ठ पक्षका नेता कैलाश चौधरी र संरक्षक रेशम चौधरी पक्षीय नेता लक्ष्मणकिशोर चौधरीले मुख्यमन्त्रीमा दाबी पेस गरेपछि कसलाई मान्यता दिने भन्ने विषय उठेको छ ।
लक्ष्मण किशोरलाई नेपाली कांग्रेस संसदीय दलका नेता कमलबहादुर शाह, नागरिक उन्मुक्ति पार्टी संसदीय दलका नेता घनश्याम चौधरी र एकीकृत समाजवादी संसदीय दलका नेता दीर्घ सोडारीको हस्ताक्षरसहित चौधरीले मुख्यमन्त्रीमा दाबी पेश गरेका छन् ।
यता कैलाशलाई नेकपा एमाले र माओवादी केन्द्रको साथ छ । अंकगणितीय रूपमा लक्ष्मणकिशोर बलियो देखिन्छन् ।
५३ सिट रहेको सुदूरपश्चिम प्रदेश सभामा कांग्रेस पहिलो दल हो । उसको प्रत्यक्षमा १२ र समानुपातिकमा ७ सिट छ । १९ सिट रहेको कांग्रेसको लक्ष्मणकिशोर पक्षमा शाहीले १८ संसदले भोट दिने देखिन्छ ।
यस्तै उनलाई नाउपा रेशम पक्षका ३ र एकीकृत समाजवादीका ४ सांसदको साथ रहेको देखिन्छ । कैलाशको पक्षमा माओवादी केन्द्र ११, एमाले ८, र नाउपाका २ सांसद कैलाशको पक्षमा छन् । कैलाशले सत्तारुढ गठबन्धनबाट २१ मत पाउने छन् ।
सुदूरपश्चिम राप्रपाले समानुपातिकमा एक सिट जितेको छ । उसले पनि रेशम पक्षका नेता लक्ष्मणकिशोरको पक्षमा मतदान गर्ने देखिएको छ । उनको पक्षमा २६ सांसदले मतदान गर्ने देखिन्छ ।
प्रत्यक्षतर्फ एक स्वतन्त्र निर्वाचित सांसदले भने कसलाई सहयोग गर्ने खुलेको छैन । सुदूरपश्चिम प्रदेश सरकार गठनका लागि बहुमतका लागि २६ सदस्यको समर्थन आवश्यक पर्छ । यसरी हेर्दा रेशम पक्षका नेता लक्ष्मणकिशोर बलियो देखिन्छन् ।
तर सरकार गठनका लागि प्रदेश प्रमुख नजिर मियाँले कसलाई मान्यता दिन्छन, त्यो हेर्न बाँकी छ ।
यसैबीच सुदूरपश्चिम प्रदेशसभा सदस्यबाट इन्दिरा गिरीलाई हटाउने नागरिक उन्मुक्ति पार्टीको निर्णयविरुद्ध सर्वोच्च अदालतले अन्तरिम आदेश समेत जारी गरेको छ ।
नाउपा अध्यक्ष रञ्जिता श्रेष्ठले समानुपातिक सांसद गिरीलाई कारबाही गरेको पत्र प्रदेशसभा सचिवालयमा पठाएपछि उनको पदमुक्त भएको थियो । उनी पदमुक्त भएको सूचना चैत २६ गते टाँसिएको थियो ।
अहिले पार्टी अध्यक्ष श्रेष्ठ प्रदेश प्रमुखको कार्यालय सुदूरपश्चिमको पुगेकी छन् । रेशम भने त्यहाँ देखिएका छैनन् ।
केन्द्रीयको गठबन्धनमा भएपनि सुदूरपश्चिममा नेकपा एकीकृत समाजवादीले कांग्रेससँग मिलेर मुख्यमन्त्रीमा लक्ष्मणकिशोरलाई सहयोग गरेपछि सत्ता गठबन्धनमा हलचल सुरु भएको छ ।
तर यसबारे नेकपा समाजवादीले भने मुख खोलेको छैन । समाजवादीले प्रदेश सरकार स्वतन्त्र हुनुपर्ने मत जायर गरेको एक नेताको भनाइ छ ।
याे पनि…
रेशम-रञ्जिता बेमेलको डढेलो : पार्टी खरानी हुने त्रास, हुलहुज्जतमा उत्रिए कार्यकर्ता
प्रतिक्रिया