काठमाडौं– चालु आर्थिक वर्ष (आव)का पछिल्ला महिनाहरूमा केही सुधार देखिएको घरजग्गा कारोबार चैत महिनामा भने स्थिर देखिएको छ । भूमि व्यवस्थापन तथा अभिलेख विभागले आइतबार सार्वजनिक गरेको तथ्यांकअनुसार फागुन महिनाको तुलनामा चैत महिनामा देशैभरीको घरजग्गाको कारोबारमा केही सुस्तता र स्थिर देखिएको हो ।

विभागका अनुसार चैत महिनामा ५० हजार २ सय ५२ कित्ता जग्गाको लिखत पारित भएको छ भने १८ वटा अपार्टमेन्टको लिखत पारित भएको छ । विभागको तथ्यांकअनुसार फागुन महिनामा ५० हजार ९ सय ९८ वटा जग्गाको लिखत पारित भएको थियो भने २९ वटा अपार्टमेन्टको लिखत पारित भएको थियो ।

कारोबारमा भएको स्थिरता देखिए पनि चैत महिनामा भने सरकारले घरजग्गा कारोबारबाट प्राप्त हुने पुँजीगत लाभकरमार्फत हुने आम्दानीमा केही वृद्धि गरेको छ । विभागको तथ्यांकअनुसार सरकारले चैत महिनामा पुँजीगत लाभकरबापत १ अर्ब ४६ करोड ९१ लाख ७ हजार १४२ रुपैयाँ आम्दानी गरेको छ, जुन फागुन महिनामा १ अर्ब २८ करोड ५० लाख ५८ हजार १७७ रुपैयाँमा सीमित रहेको थियो ।